„Рајанер“ најавува историски раст на цените на авионските билети во Европа – можно поскапување до 20 отсто

Цените на авионските билети во Европа следната година би можеле да забележат „најголем раст во историјата“, изјави во вторникот извршниот директор на „Рајанер“, Мајкл О’Лири. Според него, многу авиокомпании не се доволно заштитени од растот на цените на авионското гориво.

О’Лири прогнозира дека следната година ќе има помалку достапни места во авионите поради банкротите и преземањата на авиокомпании. Во комбинација со недоволната заштита од поскапувањето на горивото, тоа би можело да доведе до зголемување на цените на билетите и до 20 отсто.

— реклама —

„Следната година цените на авионските билети во Европа ќе растат, мислам за 10, 15, можеби и 20 отсто. Во следните 12 месеци ќе го видиме, би рекол, најголемото поскапување на авионските билети во историјата на Европа“, изјави О’Лири на прес-конференција во Брисел.

Војната со Иран предизвика нагло зголемување на цените на авионското гориво, со што се намалуваат профитните маржи на авиокомпаниите што не се заштитиле од ваквите ценовни промени.

— реклама —

О’Лири рече дека „Рајанер“ и другите европски авиокомпании имале добро обезбедени цени на горивото за 2026 година. Тој додаде дека најголемата европска авиокомпанија, кога конфликтот започнал на крајот на февруари, имала заштитено 80 отсто од потребите за гориво по цена од 67 долари за барел, и тоа до март 2027 година.

Сепак, од април 2027 година, повеќето европски авиокомпании ќе имаат многу малку вакви договори за заштита од поскапувањето, рече О’Лири.

— реклама —

О’Лири во Брисел соопшти и дека „Рајаер“ ќе укине 20 линии и повеќе од еден милион седишта од својата зимска програма во Белгија. Одлуката доаѓа по плановите на белгиските власти да ја зголемат авијациската такса во јануари, од сегашните две на седум евра.

Извршниот директор на „Рајанер“ изрази оптимизам дека американските власти овој месец ќе ја завршат сертификацијата на авионот „Боинг 737 MAX 10“, што би ѝ овозможило на компанијата да добие 16 авиони на почетокот на 2027 година.

„Боинг“ се надева дека новиот авион MAX 10 ќе добие сертификација пред крајот на октомври. Прилично сме оптимистични дека тој рок ќе биде исполнет“, изјави О’Лири за „Ројтерс“.

Американскиот министер за транспорт, Шон Дафи, се очекува во вторникот да соопшти дека Федералната управа за воздухопловство (FAA) го одобрила долго одложуваниот авион 737 MAX 10. Проблем со навигацискиот софтвер претходно се закануваше дополнително да ја одложи сертификацијата.