Главната плажа во Порторож затворена по излевање дизел-гориво во морето

Главната плажа во словенечкиот приморски град Порторож утрово е затворена за посетители, откако во морето се излеало дизел-гориво од пловило закотвено во локалната марина.

— реклама —

Општина Пиран соопшти дека ветерот ја придвижува нафтената дамка кон брегот, поради што на граѓаните им е препорачано да не влегуваат во морето.

— реклама —

Началникот на Одделението за заштита на крајбрежното море при Управата за поморство, Роберт Шкроков, изјави дека ситуацијата е ставена под контрола. Според него, ветерот го насобрал горивото непосредно покрај плажата, но се очекува поголемиот дел од него да испари до петок.

— реклама —

Според првичните проценки, околу 60 литри дизел-гориво се излеале во морето околу 8:30 часот. Под влијание на северозападниот ветер, загадувањето се проширило кон брегот, поради што капењето не се препорачува долж целата плажа во Порторож.

Локалното комунално претпријатие „Околје Пиран“ превентивно ја затвори плажата и истакна црвено знаме, додека на терен се поставени апсорпциски бариери за да се спречи понатамошното ширење на загадувањето и да се собере излеаното гориво.