Голем кибернапад во Латвија довел до кражба на податоци поврзани со околу 1,2 милиони лица и 200.000 компании, соопшти латвиската Управа за безбедност на патниот сообраќај (CSDD).
Во нападот, кој се случил минатата недела, биле украдени лични податоци и податоци поврзани со возила, меѓу кои имиња и презимиња, податоци за плаќање, регистарски ознаки и адреси. Засега не е познато кој стои зад нападот.
Латвискиот премиер Андрис Кулберг не ја исклучи можноста нападот да бил извршен од странство. Надлежните за сајбер-безбедност предупредија дека украдените информации би можеле да бидат злоупотребени од измамници.
Кулберг нареди истрага за инцидентот, но истовремено го критикуваше раководството на CSDD затоа што не го информирало навреме за кражбата на податоците.
Премиерот потсети и на претходниот хакерски напад врз државната управа за шумарство во јуни, оценувајќи дека два сериозни сајбер-инциденти во краток период се јасен сигнал дека се потребни дополнителни безбедносни мерки.
„Ова сега буквално е прашање на национална безбедност“, порача Кулберг.
