Голем пресврт: Американските сили го напуштаат Ирак до крајот на септември

Американските воени сили ќе го напуштат Ирак до 30 септември, изјави денеска ирачкиот премиер Али ал Заиди, оценувајќи дека односите меѓу Багдад и Вашингтон влегуваат во нова фаза, во која акцентот ќе биде ставен на економската соработка.

— реклама —

„На 30 септември американските сили ќе го напуштат Ирак, а американските компании ќе влезат во Ирак“, изјави Ал Заиди за време на заедничкото обраќање со американскиот претседател Доналд Трамп во Белата куќа.

— реклама —

Ова е прва официјална посета на ирачкиот премиер во САД, откако ја презеде функцијата во мај годинава. Тој истакна дека посетата претставува почеток на ново партнерство меѓу двете држави, кое ќе се темели на инвестиции и економски развој, наместо на воена соработка.

Осврнувајќи се на безбедносната состојба во земјата, Ал Заиди порача дека ирачките безбедносни сили се способни самостојно да ги заштитат границите и да ја гарантираат безбедноста, додавајќи дека правото на поседување оружје треба да остане исклучиво во рацете на државата.

— реклама —

Во меѓувреме, Исламскиот отпор во Ирак, коалиција од вооружени групи поврзани со Иран, ја осуди посетата на ирачката делегација во Вашингтон, оценувајќи дека американското воено присуство во земјата претставува окупација, и повика на ослободување на ирачката економија од американското влијание.

Ирачката влада претходно соопшти дека американските сили целосно се повлекле од воените бази на федералната територија на Ирак, додека нивното присуство сè уште го има во полуавтономниот регион Курдистан.