Голем шумски пожар ја погоди Италија: Над 100 лица се евакуирани

Повеќе од 100 луѓе беа евакуирани денеска на италијанскиот остров Сардинија откако шумски пожар се прошири во близина на населени места и ги загрози домовите.

— реклама —

Пожарот избувнал попладнево во шумскиот предел над областа Ољастра, а пламените јазици стигнале до периферијата на градот Аркана, пренесува АНСА.

— реклама —

На терен се ангажирани три авиони „Канадер“, два хеликоптери „Супер Пума“ и три лесни хеликоптери од регионалната флота, со цел пожарот да се стави под контрола.

Градоначалникот на Аркана, Анџело Стокино, изјавил дека се евакуирани повеќе од 100 луѓе, меѓу кои и 60 корисници на установа за сместување лица со ментални нарушувања.

— реклама —

Евакуирани се и жители на изолирани куќи во руралните предели, како и дел од населението од периферните делови на градот.

Ситуацијата со шумските пожари на Сардинија останува чувствителна во текот на летната сезона, при што високите температури и сувата вегетација го зголемуваат ризикот од брзо ширење на огнот.