СДСМ преку соопштение обвини дека за време на кризата со загадената вода во Гостивар, кога голем број граѓани се соочувале со здравствени проблеми, Владата преку Службата за општи и заеднички работи (СОЗР) склучила договор за набавка на вода за пиење во вредност од околу 100.000 евра.
Од партијата тврдат дека договорот бил склучен со директно договарање, без распишување јавен оглас, а според нив, набавката била реализирана со компанијата „Кожувчанка“. Посочуваат дека постапката ја спровел директорот на СОЗР, Ивица Томовски.
Според СДСМ, наместо институциите да се фокусираат на справување со последиците од загадената вода и заштита на здравјето на граѓаните, биле реализирани, како што велат, „бизнис зделки“ без тендер.
Од партијата ја критикуваат Владата, обвинувајќи дека во услови на здравствена криза профитирале блиски компании, додека, според нив, институциите доцнеле со реакција, а одговорност за случајот сè уште нема.
