Марија Митева, портпаролот на Владата на Република Македонија, најави дека годинава, по повод 35 години независност на Македонија, ќе биде организирана голема национална културна манифестација со повеќе настани низ државата.
Таа истакна дека јубилејот претставува историска точка што, како што рече, обврзува на достоинствено и современо претставување на државата преку културата, уметноста и националниот израз.
„Нашата цел е ова одбележување да има и државничка тежина, современ културен и продукциски пристап, но и меѓународна препознатливост“, рече Марија Митева.
Според најавите, проектот нема да биде ограничен само на еден настан или на една локација, туку ќе опфати повеќе градови и различни уметнички форми, со акцент на децентрализација и вклучување на граѓаните.
Во периодот од јули до септември се планирани повеќе културни настани, а централниот настан ќе се одржи на 8 Септември.
Митева посочи дека реализацијата ќе се спроведува во соработка со АВАЛОН Продукција, а деталите за програмата ќе бидат соопштувани етапно.
