Пратеничката Марија Митева реагира на изјавите на Оливер Спасовски од собраниската говорница, обвинувајќи го дека нејзиното име го поврзува со политички конструкции со цел да ја дискредитира.
Митева вели дека Спасовски треба јавно, надвор од собраниската говорница, да ги повтори тврдењата дека некој фалсификувал документи за да ја „спаси“ неа, доколку за тоа има докази.
„Повтори дека некој фалсификувал документи за да ме спаси мене. Или дека имало намера, насока или каква било интервенција од мене некој да направи нешто спротивно на закон за да ме ’спаси’. Кажи го тоа директно. Со име и презиме. И со доказ“, порача Митева.
Таа нагласува дека никогаш не барала од кого било да ја „спасува“ и оценува дека станува збор за конструкција со која Спасовски, според неа, сака да создаде политичка приказна и да ја дискредитира.
Митева во реакцијата го обвини и СДС дека и претходно користел, како што наведува, политички конструкции, инсинуации и оперативни конструкции за пресметка со политички противници.
Во продолжение одговори и со потсетување на периодот кога Спасовски беше министер за внатрешни работи, посочувајќи го случајот со издавањето 214 пасоши на странски државјани под туѓ идентитет.
„И кога веќе толку лесно зборуваш за ’фалсификување’, редно е да се потсетиме и на времето кога беше министер за внатрешни работи и кога се откри скандалот со група полициски службеници вмешани во издавање 214 пасоши на странски државјани под туѓ идентитет“, наведе Митева.
На крајот таа му порача на Спасовски да престане, како што вели, со „конструкции од говорница“ во кои го споменува нејзиното име.
