„Се релативизира насилството во партнерските односи и тоа е опасно и заслужува најостра јавна осуда“, вели Митева за изјавите на Богојески

Владината портпаролка и претседателка на Унијата на жени на ВМРО-ДПМНЕ, Марија Митева, остро ги осуди изјавите на Петар Богојески за жените и наводната потреба од „машки надзор“, оценувајќи ги како понижувачки и опасни.

— реклама —

Митева порача дека ваквите ставови претставуваат напад врз достоинството на жените, особено поради, како што посочи, релативизирањето на насилството во партнерските односи.

— реклама —

„Да се зборува за жената како за личност на која ѝ е потребен надзор е недозволиво. Најстрашно, во неговите изјави се релативизира насилството во партнерските односи и тоа е опасно и заслужува најостра јавна осуда“, изјави Митева.

Таа нагласи дека заложбите на Унијата на жени преку иницијативата „За една повеќе“ се насочени кон создавање можности жените да бидат почитувани, слободно да одлучуваат, да создаваат и да напредуваат.

— реклама —

Митева оцени дека во современото општество нема простор за оправдување или премолчување на насилството врз жените. Истовремено, го отвори и прашањето за одговорноста на медиумите при отстапувањето простор за ставови што го поткопуваат човечкото достоинство.

— реклама —

Реакцијата следува по изјавите на Богојески, кои претходно беа осудени и од Либерално-демократската партија. Од таму побараа Владата јавно да се огради од ставовите за „машки надзор“ и оправдувањето на насилството врз жените.