Пожарите во Србија и натаму бараат ангажман на голем број пожарникари, војници и воздухопловни единици, но ширењето на огнот во Делиблатската Песочара и во Столови кај Краљево е запрено. Надлежните уверуваат дека засега нема загрозени населени места и жители.
Помошникот-началник на Управата за противпожарни и спасувачки единици, Милош Миленковиќ, за РТС изјави дека состојбата во двете најкритични подрачја не е значително променета во однос на претходниот ден.
„Најважно е што на двете локации немаме загрозени жители и населени места. Тоа е приоритет на нашето дејствување“, изјави Миленковиќ.
Според него, тоа што пожарите не продолжуваат значително да се шират им овозможува на екипите да продолжат со планираните мерки, меѓу кои и создавање противпожарни просеки во Делиблатската Песочара.
Во понеделникот попладне на територијата на Србија биле активни 23 пожари на отворено. Пожарот во општина Бојник, каде што биле зафатени неколку хектари ниска вегетација, бил брзо локализиран, додека пожарникарите интервенирале и во Топличкиот и Борскиот округ.
Во Делиблатската Песочара се ангажирани припадници на противпожарните и спасувачките единици, Војската на Србија, „Србијаводе“, „Војводинашуме“ и доброволни противпожарни друштва. Во текот на само еден ден хеликоптерската единица на МВР извршила 48 налети.
Кај Столови, пак, бил ангажиран хеликоптерот „Камов Ка-32“, а се очекува воздушната поддршка да продолжи.
Гаснењето е особено тешко поради непристапниот терен. Во голем дел од Делиблатската Песочара, песочната подлога не им дозволува на противпожарните возила и на теренските возила да стигнат до жариштата. Дополнителен проблем се густиот чад, високите температури, како и стрмните делови од теренот.
Миленковиќ посочи дека на одредени места има карпи и падини со наклон до 75 степени, поради што директниот пристап до пожарот е речиси невозможен и воздушното гаснење има особено значење.
И покрај тешките услови, досега нема човечки жртви ниту загрозено население. Надлежните велат дека навременото реагирање и ангажманот на сите расположливи сили овозможиле да се заштитат жителите.
Во Белград, пак, ноќта поминала мирно кога станува збор за пожари, иако во изминатите денови бил регистриран зголемен број пожари на отворен простор.
