„Гостивар отруен од вода, 4.700 граѓани во болница а нула одговорни од власта“, вели СДСМ

СДСМ преку соопштение бара одговорност за случајот со загадената вода во Гостивар, откако, според партијата, повеќе од 4.700 граѓани побарале медицинска помош, додека досега нема одговорност од надлежните институции.

— реклама —

Од СДСМ обвинуваат дека станува збор за сериозна здравствена криза и прашуваат врз основа на кои анализи било тврдено дека водата е „технички исправна“ и безбедна за употреба.

— реклама —

Од партијата посочуваат дека премиерот Христијан Мицкоски претходно ги уверувал граѓаните дека водата може да се користи, додека министерот за здравство Сашо Клековски, според нив, подоцна изјавил дека во водата биле утврдени „многу различни бактерии и вируси“.

СДСМ бара одговори кој дозволил водата да се користи, кој потврдил дека е безбедна и каде е официјалниот извештај со анализите врз основа на кои биле дадени претходните уверувања.

— реклама —

„Со здравјето на луѓето не смее да се игра“, велат од СДСМ, од каде што додаваат дека не смее случај во кој илјадници граѓани побарале медицинска помош да помине без утврдување одговорност.

Опозициската партија го повика Јавното обвинителство да отвори постапка и да утврди дали има пропусти и кој треба да понесе одговорност за случајот со водоснабдувањето во Гостивар.