Обидот на Град Скопје да го затвори неофицијалниот пешачки премин во близина на Бит Пазар заврши без успех, откако граѓаните излегоа на терен и со жив ѕид го спречија поставувањето метална ограда.
Според очевидци, на местото се собрале претежно жители од Чаир и околните населби, кои бурно реагирале на одлуката преминот да биде затворен. Тие велат дека секојдневно го користат преминот и дека неговото укинување сериозно би им го отежнало движењето.
Градоначалникот на Скопје, Орце Ѓорѓиевски, претходно најави дека дивиот премин ќе биде трајно затворен, со образложение дека станува збор за небезбедно и нелегално преминување на коловозот. Тој посочи дека имало иницијативи преминот да биде легализиран, но Градот ја отфрлил таа можност од безбедносни причини.
Во текот на протестите, демонстрантите во неколку наврати го блокирале булеварот „Крсте Петков Мисирков“, поради што сообраќајот бил целосно запрен во одредени периоди. На терен имало засилено полициско присуство.
Во непосредна близина на дивиот премин се наоѓа натпатник кој со години не е во функција. Иако градоначалникот најави дека токму тој треба да се користи како безбедна алтернатива, граѓаните реагираат дека натпатникот е во лоша состојба и не се одржува, а нефункционални се и лифтовите поставени во него.
Засега дивиот премин останува отворен, а пешаците и натаму ја преминуваат улицата на сопствен ризик и покрај густиот сообраќај на оваа делница.
