Федерален судија во САД го одби барањето на компанијата xAI да го запре стапувањето во сила на новиот закон во сојузната држава Минесота, кој забранува апликации и интернет-страници што можат да создаваат експлицитни дипфејк слики без согласност на лицата прикажани на нив.
Американскиот окружен судија Донован Френк оцени дека компанијата не докажала дека примената на законот ќе ѝ предизвика непосредна штета. Тој посочи дека xAI ја поднела тужбата речиси три месеци по усвојувањето на законот и само неколку дена пред неговото стапување во сила, што, според него, укажува дека не постоела итност за судска интервенција.
И покрај оваа одлука, судската постапка продолжува. Рочиште е закажано за 19 август, кога ќе се разгледува барањето на xAI за привремено суспендирање на законот, кој е прв од ваков вид во САД.
Законот предвидува парична казна од 500.000 долари за развивачите секојпат кога нивните алатки ќе бидат искористени за создавање реалистични експлицитни слики или видеа од вистински лица без нивна согласност. Тој се однесува на содржини што се доволно убедливи за просечно лице да поверува дека се автентични.
Од xAI тврдат дека законот е премногу широк и дека ја нарушува слободата на изразување гарантирана со Првиот амандман на американскиот Устав. Компанијата наведува дека не се противи на спречувањето на злоупотребата на вештачката интелигенција за создавање експлицитни слики, но смета дека законските одредби можат да опфатат и содржини што се заштитени со правото на слободен говор.
Четботот Grok, развиен од xAI, претходно беше критикуван затоа што овозможувал создавање сексуализирани дипфејк слики од фотографии на вистински жени и малолетници. Компанијата воведе измени во своите политики на почетокот на годината, но според американски медиуми, ваквите злоупотреби продолжиле да бидат можни и во следните месеци.
