Груби се оградува од синоќешниот собир и се извинува: „Не го организирав, не е моја политичка порака“

Одбраната на Артан Груби јавно се огради од синоќешниот собир пред неговиот дом, организиран по укинувањето на мерката куќен притвор, и им се извини на граѓаните кои можеби биле вознемирени од настанот. Адвокатите тврдат дека собирот бил спонтан, дека Груби немал никаква улога во неговата организација и дека не станувало збор за политичка иницијатива.

Во соопштението до јавноста, одбраната наведува дека граѓани, соседи и пријатели самоиницијативно се собрале пред домот на поранешниот вицепремиер, откако беше објавена одлуката за укинување на куќниот притвор.

— реклама —

„Собирот беше спонтан, пред домот на Артан Груби, без говори, без пораки, и без политички одбележја“, наведуваат од одбраната.

Адвокатите нагласуваат дека укинувањето на мерката е резултат на одлука на надлежните органи, донесена во законски предвидена постапка, и дека не треба да биде повод за политички толкувања.

„Во името на нашиот штитеник, им се извинуваме на сите граѓани кои може да биле вознемирени синоќа од неколкуминутниот спонтан настан, што би можел да создаде погрешна слика во јавноста“, се наведува во соопштението.

— реклама —

Одбраната особено инсистира дека Груби не стои зад собирот и дека изразената поддршка не треба да се толкува како негова политичка порака.

„Артан Груби не учествувал во организацијата, ниту таа претставува некаков негов политички став или иницијатива“, тврдат неговите адвокати.

— реклама —

Според нив, секое изразување поддршка од граѓани или групи претставува личен избор на присутните и не треба да се поврзува со одбраната.

Во соопштението се повикува и на почитување на судските одлуки и владеењето на правото, без политички притисоци, лични интерпретации и влијание врз постапката.

Реакцијата доаѓа откако Основниот кривичен суд Скопје соопшти дека куќниот притвор за Груби, второобвинет во предметот „Лотарија на Македонија“, е укинат по сила на законот поради истекот на максималниот рок од 60 дена од поднесувањето на обвинителниот предлог.

Судот истовремено определи мерки за претпазливост, меѓу кои забрана за напуштање на живеалиштето, односно престојувалиштето, обврска за повремено јавување во суд и забрана за контактирање со одредени лица. Останува во сила и одземањето на патната исправа, откако беше одбиен предлогот на одбраната за нејзино враќање со гаранција.

Одбраната порачува дека нејзиниот фокус останува на правните аспекти на предметот, заштитата на правата на Груби и обезбедувањето законита и правична судска постапка.