Иранскиот врховен лидер Моџтаба Хамнеи ги повика муслиманските земји, особено државите од Персискиот Залив, на поголемо единство и меѓусебна соработка.
Во порака објавена по повод Неделата на исламското единство, Хамнеи оцени дека поделбите меѓу муслиманските земји им одат во прилог на нивните противници.
Тој ги повика муслиманските држави да соработуваат во различни области и да развиваат заеднички механизми за одбрана.
Според Хамнеи, противниците на муслиманскиот свет се обидуваат различните расни, културни, политички, економски и географски разлики да ги претворат во причина за поделби.
„Тие настојуваат сите видови разлики да ги претворат во изговор за создавање поделби меѓу муслиманските народи“, порача иранскиот лидер.
Тој особено им се обрати на владетелите на арапските земји од Персискиот Залив, поставувајќи им прашање дали нивните противници би се осмелиле да ги посакаат нивните земји и имот доколку народите и владите во регионот бидат обединети.
Хамнеи ги повика лидерите на исламските земји да го препознаат, како што тврди тој, „вистинскиот непријател“, да ги разберат неговите планови и заеднички да му се спротивстават.
Во истата порака, тој ги обвини САД и Израел дека се противници на единството меѓу муслиманските земји.
Неговите изјави доаѓаат во период на зголемени тензии меѓу Иран и арапските монархии од Персискиот Залив. Техеран во изминатиот период изведуваше напади врз американски воени објекти, но и врз инфраструктура во земји од регионот, што дополнително ги зголеми стравувањата од поширока ескалација.
Моџтаба Хамнеи во јавноста не се појавил откако, според ирански наводи, бил повреден во американско-израелските воздушни напади пред шест месеци, во кои загинал неговиот татко и поранешен врховен лидер на Иран, ајатолахот Али Хамнеи.
