Инцидент се случил во казино на подрачјето на Кисела Вода, каде две лица ги вознемирувале гостите, а потоа бил оштетен и дел од инвентарот.
Од МВР информираат дека случајот бил пријавен на 28 септември во 02:35 часот во СВР Скопје. Според пријавеното, едно од лицата фрлило мобилен телефон кон жена, но не ја погодило.
Двете лица, според пријавата, оштетиле дел од инвентарот во објектот и активирале противпожарни апарати. Поради проблеми со дишењето, неколку гости и вработени биле пренесени во Комплексот клиники „Мајка Тереза“ во Скопје за укажување лекарска помош.
Од полицијата информираат дека се преземаат мерки за расчистување на случајот.
