Хаваи се соочуваат со сериозна временска закана откако ураганот „Лала“ од прва категорија се приближи до островите, со ветрови кои достигнуваат до 130 километри на час. Станува збор за првиот ураган кој би можел директно да ги погоди Хаваите по повеќе од три децении.
За Големиот Остров е издадено предупредување за ураган, додека Мауи, Оаху, Кауаи и Ниихау се под предупредување за тропска бура. Надлежните ги повикаа жителите да се подготват за опасни услови, вклучително поројни дождови, поплави, одрони и силни бранови.
Прогнозите предупредуваат дека на Големиот Остров би можеле да наврнат и до 63 сантиметри дожд, додека плимниот бран би можел да достигне околу еден метар.
Националниот центар за урагани соопшти дека надворешниот дел од системот веќе го зафатил јужниот дел на Големиот Остров. Се очекува силниот ветер и обилните врнежи да продолжат во текот на ноќта, а потоа невремето да се придвижи кон западните острови.
Поради невремето се откажани десетици летови. На меѓународниот аеродром „Елисон Онизука Кона“ биле откажани околу 40 отсто од летовите, додека на аеродромот во Хило биле откажани околу 80 отсто.
Речиси 37.000 корисници останале без електрична енергија, а на повеќе места веќе биле пријавени одрони и паднати дрвја. Властите предупредија дека реките и нивните притоки можат брзо да се излеат, поради што се отворени засолништа за населението.
Последниот ураган кој директно ги погодил Хаваите бил „Иники“ во 1992 година. Тогаш загинале шест лица, а материјалната штета била проценета на околу три милијарди долари.
