Хаваи се подготвуваат за силно невреме откако ураганот Лоуел на Пацификот достигна највисока, петта категорија, со ветрови до 260 километри на час. Поради опасноста, на американските острови е прогласена вонредна состојба.
Според Националниот центар за урагани, Лоуел во текот на ноќта значително зајакнал, а според прогнозите се очекува во понеделник да се приближи до западните острови на Хаваи.
Метеоролозите предупредуваат дека ураганот би можел дополнително да зајакне во следните 24 часа, по што се очекува постепено слабеење. Сепак, во близина на Хаваи се предвидува да има сила од околу трета категорија.
Покрај силниот ветер, најголема опасност претставуваат огромните бранови и зголеменото ниво на морето. Ураганот може значително да го разбранува океанот долж својата траекторија и да предизвика високи бранови и надоаѓање на морската вода долж јужните брегови на Хаваи. Ризикот од поплави дополнително се зголемува поради високата плима.
Американската Национална метеоролошка служба предупреди дека се можни големи поплави долж крајбрежјето на островот Кауаи, додека значителни поплави се можни и на Оаху.
Надлежните служби ги следат движењето и јачината на ураганот и ги преземаат потребните мерки за заштита на населението.
