Хорор на пат кон училиште: Мајка го спасувала синот од мечка, па сама се нашла на ударот на дивото животно

Драма се случила во Романија, каде што жена била тешко повредена откако ја нападнала мечка додека со својот син одела на училиште. Кога забележала дека дивото животно им се приближува, мајката се обидела да му го одвлече вниманието за да му овозможи на детето да избега.

— реклама —

Инцидентот се случил во селото Залан, во општината Бодок, во округот Ковасна. Според информациите што ги објави порталот „Диги24“, момчето успеало да втрча во дворот на сосед, додека неговата мајка се обидела да ја оддалечи мечката во спротивна насока.

Животното, сепак, тргнало по жената и ја нападнало. Таа не добила каснувања, но претрпела длабоки повреди на бутот, колкот и рацете од канџите на мечката.

— реклама —

На повиците за помош реагирале жители на селото, кои ѝ притрчале на жената. Таа била пренесена во болница, каде што итно била оперирана. Детето, за среќа, успеало да се спаси без повреди.

— реклама —

Мечката подоцна избегала и сè уште не е пронајдена. Надлежните ја следат состојбата во областа и поставиле стапица за животното.

Градоначалникот на општината Бодок, Иштван Фодор, изјавил дека ќе пука во секоја мечка што ќе се појави во населеното место, без оглед на последиците. Тој ги критикувал надлежните во Министерството за заштита на животната средина, обвинувајќи ги дека не ги слушаат предупредувањата на жителите од планинските села.

Според него, мечките сè почесто се приближуваат до населените места, овоштарниците, полињата со пченка и земјоделските површини, што предизвикува сè поголема загриженост кај локалното население.