Хрватски борбен авион „Рафал“ пресретнал патнички авион што испратил сигнал за киднапирање

Хрватски борбен авион „Рафал“ денеска пресретнал малтешки патнички авион „Боинг“ во воздушниот простор над подрачјето на Кореница, откако леталото било прогласено за можна закана поради сигнал што укажувал на киднапирање. Ова е прва операција за пресретнување и идентификација во реални услови што ја извеле хрватските авиони „Рафал“ во рамките на системот на НАТО за воздушен надзор и заштита.

— реклама —

Според соопштението на хрватското Министерство за одбрана, операцијата започнала по наредба на Заедничката воздушна команда во Торехон, која побарала полетување на борбен авион со задача визуелно да го идентификува патничкото летало.

— реклама —

Хрватскиот „Рафал“ воспоставил радиоврска со авионот, визуелно го идентификувал, а во 11:18 часот извршил воздушна патрола во подрачјето меѓу Риека и Делнице и го придружувал малтешкиот авион надвор од хрватскиот воздушен простор. Две минути подоцна, во 11:20 часот, цивилното летало влегло во словенечкиот воздушен простор.

Малтешкиот авион летал на релација од Грција кон Германија. Според информациите од центарот за известување на командата во Италија, на неговиот транспондер бил поставен кодот 7500, кој укажува на киднапирање на летало.

— реклама —

Германските медиуми објавија дека најверојатно станува збор за „Боинг 737-800“ на авиокомпанијата „Корендон ерлајнс“, која е дел од турско-холандската туристичка група „Корендон туризам груп“.

Во меѓувреме, аеродромот во Нирнберг, Германија, бил привремено затворен поради сомнеж за вонредна состојба во воздушниот сообраќај. Портпарол на полицијата соопштил дека затворањето се случило непосредно пред планираното слетување на авион што доаѓал од грчкиот остров Крф.