„И Бурџ Калифа ќе испадне занаетчиска работа!“ – родителите на загинатите во „Пулс“ револтирани од вештачењето претставено во судот

„Челични столбови, метални конзоли, зајакнување на меѓукатната конструкција, промена на фасада и дополнителни метални степеници на влезот – но реконструкција немало, сето тоа биле занаетчиски работи!“ Со ваква реакција родителите на загинатите во пожарот во дискотеката „Пулс“ во Кочани се огласија по денешното судско рочиште, револтирани од она што, според нив, било изнесено во судницата од вештото лице ангажирано од првообвинетиот.

Родителите го оспоруваат толкувањето според кое градежните интервенции во објектот не претставувале реконструкција, туку занаетчиски работи. Тие прашуваат како поставувањето метални конструкции и зајакнувањето на меѓукатната конструкција може да се третираат на таков начин.

„Сето ова денес го слушаме во судницата од вештото лице на првообвинетиот! Очигледно погрешно сме го разбрале Законот за градење!“, наведуваат родителите во својата реакција.

— реклама —

Со иронија, тие го коментираат ваквото објаснување и прашуваат дали според истата логика секоја градежна интервенција би можела да се претстави како обична занаетчиска работа.

„Да градиме без одобренија, а потоа да тврдиме дека само ‘занаетчиски сме работеле’! А кога ќе се случи трагедија – тогаш тие што се на обвинителна клупа се изјаснуваат дека не се одговорни“, порачуваат родителите.

Тие директно ја прашуваат одбраната дали токму вакво толкување се обидува да наметне пред судот, нагласувајќи дека правото на одбрана е неспорно, но дека природата на изведените градежни работи мора да се утврдува врз основа на доказите, а не само според називот што им се дава.

— реклама —

„Дали токму вакво толкување одбраната сака да го наметне пред судот? Правото на одбрана е неспорно. Но градежните интервенции не исчезнуваат со нивно преименување, ниту одговорноста се избегнува со игра на зборови!“, стои во реакцијата.

Родителите одат и чекор понатаму, споредувајќи го ваквото толкување со изградбата на највисоката зграда во светот.

— реклама —

„Според ваквата логика, и Бурџ Калифа во Дубаи би можела да се прогласи за ‘занаетчиска работа’!“, наведуваат тие.

Во реакцијата посочуваат дека расправата за тоа дали во „Пулс“ биле изведувани реконструктивни или занаетчиски работи не е само прашање на градежна терминологија, туку и на безбедноста на објектот и евентуалната одговорност за пропустите пред трагедијата

„Овде не се расправа само за градежни конструкции, туку за безбедноста, одговорноста и 63 животи што никогаш нема да се вратат“, порачуваат родителите.

Нивната реакција завршува со барање судот да ги утврди фактите врз основа на изведените докази, без оглед на спротивставените толкувања на странките во постапката.

„Вистината не се реконструира според потребите на одбраната. Таа се утврдува со докази!“, нагласуваат родителите на загинатите во „Пулс“.

Прашањето дали градежните интервенции во објектот претставувале реконструкција за која биле потребни соодветни одобренија останува предмет на судското докажување. Ставовите на вештите лица и аргументите на одбраната треба да бидат оценети во рамките на постапката, а конечните заклучоци за евентуална кривична одговорност се во надлежност на судот.