Прашањето за изградба на дата центри во Македонија ја отвори дилемата – дали станува збор за развојна шанса или за ризик за ресурсите. Дата центрите, најавени како двигател на дигиталната економија, отворија сериозни прашања за струјата, водата и улогата на државата во нивната изградба.
На овие дилеми одговори премиерот Христијан Мицкоски, кој оцени дека станува збор за инвестиции што можат да донесат развој, нови работни места и технолошки напредок.
„Не можеме да се помириме со фактот дека таа мала група на луѓе која создава хистерија ќе се обиде повторно да го попречи развојот на државата“, рече Мицкоски.
Тој посочи дека најразвиените држави во светот интензивно инвестираат во вештачка интелигенција и дата центри и дека Македонија не смее да остане надвор од тие процеси.
„Се обидуваме да ја развиваме државата, да создаваме нова вредност и нема да се повлечеме позади овие луѓе, малкумина кои создаваат хистерија и мислат дека на тој начин ќе го манипулираат народот“, изјави премиерот.
Мицкоски нагласи дека ќе ги поддржи проектите само доколку се исполнети сите законски и технички услови.
„Ќе застанам позади секој проект, не за еден мегават, не за пет, туку и за сто и повеќе мегавати, во моментот кога ќе бидат исполнети условите согласно закон и техничките критериуми“, рече тој.
На пресот беше отворено и прашањето за транспарентноста на процесот, со забелешка дека јавноста сè уште нема доволно информации за локациите, капацитетите и обемот на инвестициите.
На тоа Мицкоски одговори дека Владата ќе излезе со повеќе детали кога разговорите ќе влезат во поконкретна фаза.
„Кога ќе имаме поконкретни информации, ќе излеземе во јавноста и ќе кажеме. Пред договор сме со оваа компанија, со толкава инсталирана моќност, со толкав капацитет, толку нови работни места и толкав обем на инвестиции. До тогаш сме како идеја и мораме да ги прилагодиме законските решенија за оваа идеја да стане реалност“, изјави премиерот.
Тој додаде дека Владата гледа на дата центрите како дел од идниот технолошки развој на државата и како можност Македонија да биде дел од глобалните трендови во областа на вештачката интелигенција и дигиталната инфраструктура.
