Министерот за здравство Сашо Клековски изјави дека актуелната епидемија во Гостивар не е прв ваков случај во градот, потсетувајќи дека и во 2017 година имало масовно заболување, но причината никогаш не била официјално утврдена.
Тој рече дека токму поради искуството од пред девет години, институциите сега се целосно насочени кон утврдување на причинско-последичната врска и откривање на изворот на заразата.
„Во Гостивар ова не е прва ваква ситуација. Во 2017 година имаше околу 800 засегнати, односно пријавени пациенти, без разрешница, односно без да се најде што е причинителот“, изјави Клековски.
Министерот нагласи дека целта на истрагата е овојпат јавноста да добие јасен одговор што довело до епидемијата, за вакви ситуации да не се повторуваат.
„Ние сме целосно посветени да најдеме причинско-последична врска и да ја информираме јавноста што е причината за оваа состојба, за таа конечно да може да биде разрешена. Гостивар не смее понатаму да биде жртва на вакви настани“, рече Клековски.
Во меѓувреме, надлежните институции продолжуваат со анализите на мострите од водата и со епидемиолошките истражувања, додека Јавното обвинителство води предистражна постапка за утврдување на евентуална кривична одговорност во врска со загадувањето на водата за пиење во Гостивар.
