Илон Маск ќе вложи 100 милиони долари за поддршка на републиканците на изборите во САД

Извршниот директор на „Тесла“, Илон Маск, одобрил издвојување на 100 милиони долари преку својот политички комитет „Америка ПАК“ (America PAC) за поддршка на републиканските кандидати на изборите за Конгресот во ноември, објави „Њујорк тајмс“.

— реклама —

Средствата ќе бидат насочени кон најмалку осум американски сојузни држави, каде што комитетот планира да организира кампањи со директни посети на гласачите, дигитално рекламирање и испраќање пошта до конзервативните избирачи.

— реклама —

Според извештајот, на претседателските избори во 2024 година организацијата посетила околу 10 милиони домаќинства во шест клучни сојузни држави со цел да ја зголеми излезноста на гласачите.

— реклама —

„Њујорк тајмс“ наведува дека Маск, кој важи за најголем индивидуален политички донатор во историјата на САД, повторно се вклучува во финансирањето на републиканците во период кога претседателот Доналд Трамп се соочува со пад на рејтингот поради економските предизвици и тензиите со Иран.

Иако претходно најави дека ќе ги намали политичките донации, по несогласувањата со Трамп околу буџетските политики и краткото дистанцирање од републиканците, Маск повторно ја обновил поддршката за партијата пред претстојните избори.