Проблемите со откупот на пиперката се надминати, а откупот во последните неколку дена се одвива според очекувањата, изјави премиерот Христијан Мицкоски.
Одговарајќи на новинарско прашање Мицкоски рече дека според информациите што ги добил од министерот за земјоделство, шумарство и водостопанство, претходно биле одржани разговори меѓу засегнатите страни.
Премиерот посочи дека Владата ги поддржува земјоделците во барањата за повисока откупна цена, оценувајќи дека нивниот производ бил потценет од откупувачите.
Тој откри дека на земјоделците им било предложено заеднички да се протестира пред најголемите откупни центри, но иницијативата не била прифатена.
„Ние ги поддржуваме земјоделците за повисоки цени. Им рековме: Ајде да одиме да протестираме заедно кај откупувачите, знаеме кои се три-четири најголеми откупувачи. Но, тие рекоа дека не сакаат да протестираат“, рече Мицкоски.
Според него, по разговорите сепак бил постигнат договор меѓу страните, со што проблемот бил надминат.
„Ние сакаме да имате повисока цена за вашиот род и заслужувате повисока цена. Вашиот род од страна на откупувачите е потценет. Ајде заедно да протестираме. Тогаш наеднаш се постигна договор и се затвори целата оваа приказна“, додаде премиерот.
Мицкоски изрази задоволство што, како што рече, сите страни сега се задоволни и што откупот на пиперката веќе неколку дена се одвива според очекувањата.
