Претседателот на Собранието, Африм Гаши, е хоспитализиран и се наоѓа во стабилна здравствена состојба, информира Министерството за здравство.
Гаши бил примен на Клиниката за дигестивна хирургија околу полноќ, поради силни болки во стомакот. Веднаш по приемот му биле направени сите потребни радиолошки и лабораториски испитувања, при што е дијагностицирана интестинална опструкција на тенкото црево – состојба која подразбира нарушено движење на содржината низ цревото.
Според официјалната информација, Гаши е задржан на болничко лекување и е под постојан лекарски надзор. Во моментов се применува конзервативен медикаментозен третман, односно терапија без хируршка интервенција, бидејќи засега нема индикации за операција.
Министерството најави дека јавноста ќе биде навремено информирана доколку има промени во неговата состојба.
