Австралија воведува нови ограничувања за рекламирање на коцкање, со цел да се намали влијанието врз јавното здравје и особено врз младите, а меѓу клучните мерки е и целосна забрана за појавување на познати личности во ваквите реклами.
Владата предводена од Ентони Албанезе најави дека новите правила ќе стапат во сила од 2027 година и ќе вклучуваат строги ограничувања за онлајн рекламирањето, кое ќе биде дозволено само за регистрирани корисници постари од 18 години.
Покрај тоа, ќе се воведе лимит од најмногу три реклами на час во периодот од 6 до 20:30 часот, додека рекламирањето за време на директни спортски преноси во овој термин ќе биде целосно забрането.
Мерките доаѓаат по повеќегодишни критики дека државата недоволно реагира на растечките проблеми поврзани со коцкањето, кое, според проценките, ги чинело Австралијците околу 34 милијарди австралиски долари само во изминатата година.
„Ниту еден родител во оваа земја не би прифатил неговите деца да гледаат реклами за коцкање“, изјави Тим Костело, застапник за реформи во оваа област.
„Владата не би смеела да тврди дека ги штити децата ако одговорноста ја префрла на родителите да се одјавуваат од ваквите содржини“, додаде Тим Костело.
Премиерот Албанезе ги брани новите политики, оценувајќи ги како најзначајна реформа досега.
„Владата презема решителни мерки за справување со општествените и здравствените проблеми поврзани со коцкањето“, изјави Ентони Албанезе.
„Целта е да се намали изложеноста на децата на штетното влијание на коцкањето и да се стави крај на поплавата од реклами“, додаде Ентони Албанезе.
Со новите правила ќе се забрани и брендирањето на коцкарски компании на спортски терени, дресови и службена опрема, што директно ќе ја погоди индустријата, особено водечките компании за онлајн обложување.
