Француската полиција уапси маж кој се сомничи за убиство, откако во реката Сена кај Париз беа пронајдени четири тела, пренесува BBC.
Првото тело било забележано на 13 август од страна на минувач кај мостот во предградието Choisy-le-Roi, југоисточно од Париз. Истата вечер, полицијата при претрес на подрачјето пронашла уште три тела во водата. Според обвинителството, една од жртвите била задавена, а кај друга биле утврдени траги од насилство.
Првата идентификувана жртва е локален маж на 40-годишна возраст, чието тело било релативно кратко време во водата. Останатите три тела, пак, биле во „напредна состојба на распаѓање“.
Обвинителството соопшти дека засега нема докази дека четворицата се поврзани. Можно е телата да биле потопени на различни локации узводно, по што Сена ги донела до мостот кај Choisy-le-Roi.
Осомничениот е во притвор во Париз, но засега не е објавен неговиот идентитет ниту бројот на убиствата за кои се испитува.
