Иранската Револуционерна гарда тврди дека соборила американски борбен авион над централниот дел на земјата, додека од Вашингтон засега нема официјален коментар за овие тврдења. Во меѓувреме, на социјалните мрежи почнаа да се шират снимки за кои се тврди дека ја покажуваат потрагата по пилотот.
Според иранските медиуми, станува збор за стелт-авион F-35, кој наводно бил погоден од иранската противвоздушна одбрана. Во извештаите се наведува дека леталото било целосно уништено при падот, а судбината на пилотот засега не е позната.
Некои воени аналитичари на социјалните мрежи сепак тврдат дека на снимките можеби се гледа друг тип на авион, како F-15, а не F-35. Поради тоа, автентичноста на видеата и фотографиите сè уште не е потврдена.
Во меѓувреме, американската војска претходно ги отфрли сличните тврдења на Техеран, нагласувајќи дека сите американски борбени авиони се евидентирани и безбедни.
Инцидентот доаѓа во период на сериозна ескалација на конфликтот на Блискиот Исток, каде што последните недели се водат интензивни воздушни и ракетни напади меѓу Иран, САД и нивните сојузници.
