Иранското Министерство за разузнавање соопшти дека во обемна безбедносна операција се уапсени 111 лица во 26 покраини, меѓу кои и четири лица осомничени за шпионажа во корист на САД.
Според државната новинска агенција, акцијата била спроведена во текот на една ноќ, при што, како што тврдат властите, биле разбиени десетици опозициски ќелии и запленета „значителна количина“ оружје.
Во соопштението се наведува дека четворицата осомничени шпиони биле уапсени во покраините Хамадан и Западен Азербејџан, и дека наводно собирале чувствителни информации за безбедносните структури.
„Овие лица доставувале податоци за локации на командни центри, опрема и распоред на безбедносните сили“, соопшти Министерството.
Иранските власти ги опишаа уапсените како „предавници“ кои соработувале со странски служби.
Независна потврда за наводите засега нема, а ваквите тврдења доаѓаат во период на зголемени тензии меѓу Иран и САД.
