Не чувствуваат вина – со ваков став тројцата полициски службеници од Кочани го започнаа судскиот процес во Основниот кривичен суд Скопје, каде се обвинети за постапувањето при контролите во дискотеката „Пулс“.
Судењето продолжи со сослушување на сведоци предложени од одбраната, меѓу кои и полициски службеник кој сведочеше дека во 2023 година учествувал во две контроли во објектот – во април и во декември.
Тој посочи дека при контролите биле затекнати малолетни лица, по што им биле одземени личните документи и биле преземени соодветни чекори. Воедно наведе дека сопственикот на објектот не соработувал, што дополнително го отежнувало постапувањето на терен.
Сведокот појасни дека дел од административните активности, како изготвување записници, ги вршеле други службени лица.
Обвинението тврди дека полицајците не постапиле согласно пропишаните процедури при акциските контроли и внеле неточни податоци во службената документација, со што не ги извршиле своите должности во целост.
