Второто рочиште од судскиот процес за катастрофалниот пожар во кочанската дискотека „Пулс“, во кој животот го загубија 63 млади лица, не донесе напредок во постапката. Наместо обвинетите да се произнесат дали се чувствуваат виновни, постапката беше стопирана поради сериозни забелешки од одбраната.
Адвокатите на обвинетите остро реагираа дека Обвинителството извршило спојување на првичното обвинение со она поднесено против сопственикот на фирмата задолжена за обезбедување на дискотеката, а новиот „интегриран“ документ никогаш не бил доставен до лицата што се товарат за трагедијата. Според нив, со спојувањето се изменила содржината, доказите биле измешани и обвинетите не знаат што точно се става на нивен товар.
„Ние во судница ја примивме таа интегрирана верзија, но никој од обвинетите ја нема. Тие не можат да се изјаснат за вина за документ што не го виделе. Дел од луѓето се во притвор, дел во куќен притвор — треба да знаат за што се обвинети“, рече адвокатот Звонко Давидовиќ.
Сличен став изнесе и адвокатот Петре Шилегов, оценувајќи дека ваквиот пропуст на Обвинителството е неприфатлив не само за судот и одбраната, туку и за семејствата на загинатите. „Ако продолжи ваков пристап, правдата ќе остане недостижна. Целта е виновните да одговараат, а невините да бидат ослободени, но со хаос во обвинението тоа е невозможно“, порача Шилегов.
Иако обвинителите тврдеа дека суштински промени во обвинението нема и дека рочиштето може да продолжи, судијката Дијана Груевска Илиевска ги прифати барањата на одбраната. Таа одлучи изјаснувањето за вина да се одложи, а денешното рочиште да се искористи за разгледување на побарувањата за отштета на семејствата на жртвите.
Родителите повторно беа присутни во судницата и изразија задоволство од начинот на кој судијката го води процесот. „Повеќе од осум месеци живееме во агонија. На првото рочиште почувствував искра надеж. Сакаме само правда за нашите деца“, истакна Јулија Златкова, мајка на загинатиот Томас.
