Земјотрес со јачина од 6,1 степен според Рихтеровата скала е регистриран на Алјаска, соопшти Американскиот геолошки завод.Потресот се случил на длабочина од еден километар во Северниот Тихи Океан, наведува Американскиот геолошки завод.Американскиот систем за предупредување не издал тревога за цунами.Најблиското населено место до епицентарот на земјотресот е Николски, во американската сојузна држава Алјаска.
Свет | пред 1 месец
Американскиот претседател Доналд Трамп бил блиску до прекин на преговорите со рускиот лидер Владимир Путин на средбата на Алјаска, јавува Axios. Причината, според порталот, била инсистирањето на Путин за анексија на целата Доњецка област.Путин на преговорите поставил услов Русија да добие целосна контрола врз Доњецката област, од која моментално контролира околу 75% територија. Тој бил толку цврст во ставовите што, според извори на Axios, Трамп во еден момент бил подготвен да ја напушти средбата.Неименуван извор го цитира Трамп кој му рекол на Путин:„Ако е Доњецк тука клучен и ако нема попуштање, тогаш нема смисла да го продолжуваме ова.“По таа изјава, Путин наводно се откажал од својот максималистички услов.Проценките во САД се поделени: едни предвидуваат дека Русија може целосно да ја заземе Доњецката област до октомври, додека други предупредуваат дека таквата операција би била тешка и неизвесна.Според Reuters, во нацрт-условите на Москва за прекин на војната се барало и повлекување на украинските сили од Доњецката и Луганската област.Во меѓувреме, државниот секретар на САД, Марко Рубио, изјави дека Вашингтон нема да врши притисок врз Украина да отстапи територија на Русија како дел од евентуален мировен договор.Украинскиот претседател Володимир Зеленски во понеделникот порача дека преговорите мора да ја земат предвид актуелната линија на фронтот. Тој нагласи дека Уставот на Украина не дозволува никакво отстапување или размена на територија.
Свет | пред 7 месеци
Украинската делегација денеска пристигна во Белата куќа на состанокот со американскиот претседател Доналд Трамп.Како што забележа BBC, заменик-шефот на кабинетот на претседателот Володимир Зеленски, Сергиј Палица, бил фотографиран додека влегувал во Белата куќа носејќи свиткан лист хартија.Од далечина, документот изгледал како мапа, што веднаш предизвика шпекулации во медиумите дали станува збор за карта со бојни линии, територијални предлози или дипломатски белешки што треба да се презентираат на денешните разговори.Детали околу содржината на документот засега не се познати.
Свет | пред 7 месеци
Клучниот помошник на Владимир Путин и главен руски преговарач, Кирил Дмитриев, повторно сподели објава на американскиот претседател Доналд Трамп во која тој ги изнесува своите услови кон Украина за ставање крај на војната.Во објавата стои дека Украина би можела да стави крај на конфликтот доколку прифати неколку клучни руски барања: одрекување од Крим, кој Москва го анектираше во 2014 година, и обврска дека никогаш нема да стане членка на НАТО.„Трамп и неговиот тим се залагаат за вистинско решение. Нека надвладее решавањето на проблемот и мирот за време на Големиот ден“, напиша Дмитриев на социјалната мрежа X, алудирајќи на средбата во понеделник помеѓу Трамп и украинскиот претседател Володимир Зеленски.„Трамп и неговиот тим се обидуваат да најдат реално решение за конфликтот во Украина,“ изјави Дмитриев, специјален изасланик на Путин, пренесе агенцијата ТАСС.Со оваа изјава Москва јасно сигнализира дека очекува Зеленски да се соочи со најтешкиот притисок досега – прифаќање на услови што значат откажување од дел од територијата и трајно дистанцирање од НАТО.
Свет | пред 7 месеци
Украинскиот претседател Володимир Зеленски во Белата куќа го очекува тежок состанок со американскиот лидер Доналд Трамп. Според проценки на експерти, условите за можен мировен договор веројатно нема да одат во корист на Киев.Роберт Инглиш, директор на Центарот за средноевропски студии на Универзитетот во Јужна Калифорнија, изјави за Си-Ен-Ен дека Трамп бил мошне јасен во своите пораки кон Зеленски.„Трамп му порача дека ќе мора да прифати како поголемиот дел од изгубените територии долгорочно остануваат изгубени. Сите илузии за враќање на Крим и поголемиот дел од Донбас се завршени“, вели Инглиш.Тој додава дека украинскиот лидер ќе мора да се соочи со болната вистина: „Зад кулисите постои јасно разбирање дека Зеленски ќе мора да ја проголта таа горчлива пилула. Сега фокусот мора да биде ставен на иднината и на цврсти безбедносни гаранции за Украина.“Зеленски во Вашингтон ќе биде придружуван од силна европска делегација – францускиот претседател Емануел Макрон, германскиот канцелар Фридрих Мерц, британскиот премиер Киер Стармер и претседателката на Европската комисија Урсула фон дер Лајен.Целта на посетата е координација на поддршката за Киев и обликување на заеднички пристап кон идната западна помош за Украина.„Фактот што сите се таму заедно и се обидуваат да постигнат заедничко разбирање е клучен“, нагласува Инглиш.Сепак, според него, главниот акцент најверојатно ќе се префрли од членството во НАТО кон долгорочни безбедносни договори.„Сè додека постои подготвеност на Украина да ѝ се обезбедат воени сили, снабдување, разузнавачки податоци и логистика, а тоа биде поткрепено со договор кој може да трае со години и неограничено да се обновува – тоа ќе биде многу блиску до НАТО-заштита. А тоа е токму она што Украина досега го немаше,“ додава Инглиш.
Свет | пред 7 месеци
Американскиот претседател Доналд Трамп ја поддржува иницијативата на Владимир Путин за постигнување мировен договор со Украина, кој предвидува предавање на делови од Донбас под руска контрола, објави New York Times, повикувајќи се на двајца високи европски функционери.Трамп им рекол на европските лидери дека верува оти мировен договор е можен ако украинскиот претседател Володимир Зеленски се согласи да се повлече од регионот Донбас, кој Русија не успеа целосно да го заземе и покрај повеќе од три години жестоки борби.Според изворите, на самитот на Алјаска Путин директно побарал Украина да се повлече од Донецк и Луганск како услов за запирање на војната. За возврат, Москва би се согласила да ја „замрзне“ бојната линија во јужните региони Херсон и Запорожје.Иако Луганск е речиси целосно под руска контрола, Украина сè уште ги држи главните делови од Донецк – вклучително и градовите Краматорск и Славјанск, како и силно утврдените позиции кои ја чинеле земјата десетици илјади жртви во одбрана.Поддршката на Трамп за предавање на Донбас – регион богат со јаглен и железна руда – доаѓа во момент кога тој јавно бара директно склучување мировен договор, а не само прекин на огнот, кој, според него, „често не трае долго“.
Свет | пред 7 месеци
FOX News објави дека првата дама на САД, Меланија Трамп, испратила писмо до рускиот претседател Владимир Путин, кое американскиот претседател Доналд Трамп лично му го предал за време на самитот на Алјаска.Што пишува во писмото?Во писмото, кое е објавено во целост, Меланија се обраќа на емотивен начин:„Секое дете во своето срце носи исти тивки соништа, било да е родено во скромна рурална средина или во величествен град. Тие сонуваат за љубов, можности и заштита од опасности... Господине Путин, вие можете да им го вратите нивниот насмеан глас.Штитејќи ја невиноста на тие деца, ќе служите не само на Русија, туку и на целото човештво. Вие сте човек способен да ја оствари таа визија со еден потег на перото – веќе денес. Време е.“Reuters потврди дека Трамп на состанокот лично го предал писмото од својата сопруга. Меланија, родена во Словенија, не отпатувала со него на Алјаска.Проблемот со одземање на украински деца е една од најтешките точки во војната:Украина обвинува дека десетици илјади деца биле одведени во Русија или на окупираните територии без согласност на семејствата, што го квалификува како геноцид според Конвенцијата на ОН.Москва, пак, тврди дека само „штити ранливи деца од војната“, што Киев и Западот го нарекуваат пропаганда.
Свет | пред 7 месеци
Американскиот претседател Доналд Трамп, за време на самитот на Алјаска, лично му предал писмо од сопругата Меланија Трамп на рускиот претседател Владимир Путин, соопштија за агенцијата Ројтерс високи функционери од Белата куќа.Првата дама, која е родена во Словенија, не патуваше со Трамп во Алјаска, но во писмото, според изворите, таа го отвора прашањето за судбината на децата погодени од војната – особено за оние кои биле киднапирани и однесени во Русија или на територии под руска окупација.Според податоците на Киев, од почетокот на целосната руска инвазија во февруари 2022 година, најмалку 19.500 украински деца се депортирани или насилно оддалечени од своите домови. Украинските власти инсистираат дека никаков мировен договор не смее да се потпише без гаранции за нивно враќање.Прашањето е крајно чувствително и на меѓународна сцена: во 2023 година Меѓународниот кривичен суд издаде налог за апсење за Путин и неговата комесарка за права на деца, Марија Лвова-Белова, токму поради незаконската депортација на украински деца – дело што Киев го смета за воен злостор и чин на геноцид.
Свет | пред 7 месеци
Претседателскиот авион „Ер форс уан“ на Доналд Трамп се врати од Анкоридж и слета во Вашингтон околу 02:00 часот по локално време (07:00 BST), јавуваат новинарите кои патуваа со американскиот претседател.Според портпаролката на Белата куќа, Каролин Левит, за време на летот Трамп остварил долг телефонски разговор со украинскиот претседател Володимир Зеленски.По слетувањето, Трамп веднаш стапил во контакт и со лидерите на НАТО, информираат од Белата куќа.
Свет | пред 7 месеци
Германската влада зазеде претпазлив пристап по самитот на Алјаска меѓу американскиот претседател Доналд Трамп и рускиот лидер Владимир Путин, пренесе dpa.Според извори во Берлин, канцеларот Фридрих Мерц бил постојано информиран за случувањата во Анкоридж, а неговиот тим одржувал активна комуникација со меѓународните сојузници. Трамп изјави дека ќе ги извести европските партнери за исходот од разговорите, но не прецизира кога.Иако темата Украина беше во фокусот на очекувањата, двајцата лидери споделија малку детали, без конкретен напредок околу можен прекин на огнот.Со остра реакција настапи поранешниот шеф на Минхенската безбедносна конференција, Волфганг Исчингер. На „Х“ тој напиша: „Нема вистински напредок – очигледно 1:0 за Путин – нема нови санкции. За Украинците: ништо. За Европа: длабоко разочарување.“Исчингер истакна дека Путин добил црвен тепих и симболична победа, додека Трамп, според него, не извлекол ништо значајно.
Свет | пред 7 месеци
По завршувањето на самитот во Алјаска, нема реакција од украинскиот претседател Володимир Зеленски, кој не беше поканет да учествува во разговорите меѓу Доналд Трамп и Владимир Путин.Американскиот претседател претходно најави дека неговиот прв телефонски повик по средбата ќе биде упатен токму до Зеленски. Британскиот премиер Киер Стармер, инаку еден од најгласните европски поддржувачи на Украина, исто така засега не ја коментира средбата. Зеленски само пред неколку дена беше во Лондон, каде заедно со Стармер нагласија „силно чувство на заедништво“.Од друга страна, Путин изјави дека е подготвен за нова средба со Трамп – „следниот пат во Москва“. Засега нема дополнителни детали за можно продолжување на преговорите или за тоа дали на нив ќе учествува и Киев.
Свет | пред 7 месеци
Пет часа по завршувањето на самитот во Алјаска, американскиот претседател Доналд Трамп и рускиот претседател Владимир Путин ја напуштија средбата без да постигнат договор за прекин на војната во Украина.Двајцата лидери слетаа во Анкоридж нешто по 11:00 часот по локално време, каде што беа пречекани со црвен килим и долго ракување. Путин, видливо расположен, заедно со Трамп беше возен во американското претседателско возило „The Beast“ – потег што руските државни медиуми го претставија како симбол на блискост.Средбата траела околу три часа, а на масата со лидерите присуствувале и двајца блиски советници од двете страни. Слоганот на самитот беше „Pursuing Peace“ („Во потрага по мир“), но претседателот на Украина, Володимир Зеленски, кој веќе предупреди дека иднината на земјата не може да се одлучува без Киев, повторно не беше вклучен во разговорите.По средбата, новинарите беа собрани на она што беше најавено како заедничка прес-конференција, но и Трамп и Путин дадоа само кратки изјави без да одговараат на прашања. Путин одржа подолго обраќање, но минимално ја спомна Украина, нагласувајќи дека е „искрено заинтересиран“ да се стави крај на конфликтот.„Сè уште има точки на несогласување. Нема договор додека не се постигне вистински договор“, изјави Трамп, додавајќи дека „не стигнавме таму иако имаше напредок“.Еден час по завршувањето на разговорите, двајцата претседатели повторно се качија во своите авиони и ја напуштија Алјаска. Во интервју за Fox News, Трамп го повика Зеленски да „направи договор“.Од Киев и европските сојузници сè уште се чека официјална реакција.
Свет | пред 7 месеци
Зад затворени врати во Алјаска, преговорите меѓу американската и руската делегација се одвиваат во формат „тројца на тројца“ – секој од претседателите има уште двајца клучни советници на масата.Од руската страна присутни се:Сергеј Лавров, министер за надворешни работи веќе повеќе од две децении, санкциониран заедно со Путин по почетокот на инвазијата врз Украина во 2022 година.Јури Ушаков, надворешнополитички советник на Путин повеќе од десет години и поранешен амбасадор во САД.Кремљ претходно најави дека во „проширениот формат“ ќе се приклучи и рускиот министер за одбрана, но не е познато кога.Од американската страна се:Марко Рубио, државен секретар и познат надворешнополитички „јастреб“ од кабинетот на Трамп.Стив Виткоф, специјален пратеник и личен пријател на Трамп, првично назначен за Блискиот Исток, но често вклучен во разговори за Украина.Истите четворица советници се сретнаа и во февруари во Саудиска Арабија на мировните преговори за Украина – тогаш без Трамп и Путин.И овојпат, на масата нема претставник од Украина, иако иднината на земјата е главна тема на преговорите. Забележителен е и отсуството на специјалниот пратеник на САД за Украина, Кит Келог.
Свет | пред 7 месеци
Рускиот претседател Владимир Путин двапати беше директно прашан од новинари дали ќе престане со убивање цивили – и двапати одлучи да молчи.Првото прашање беше поставено кога тој и американскиот претседател Доналд Трамп се фотографираа по излегувањето од авионите и официјалното ракување. Второто – на почетокот на состанокот, додека двајцата лидери позираа за фотографиите пред медиумите. Во двата случаи, Путин не даде никаков одговор. Снимките од неговата реакција брзо се проширија на социјалните мрежи, предизвикувајќи лавина коментари и дебати околу неговото однесување и политичката порака што ја испраќа со молкот.
Свет | пред 7 месеци
На црвениот тепих во Алјаска, американскиот претседател Доналд Трамп му приреди топол пречек на Владимир Путин – гест што остро контрастира со односот на западните лидери кон рускиот претседател од почетокот на целосната инвазија врз Украина.Слоганот на самитот, „Pursuing Peace“ („Во потрага по мир“), на многумина им звучи познато. За време на првиот мандат на Трамп, во февруари 2020 година, неговата „високоризична“ дипломатија доведе до договор со Талибанците, познат како „Bringing Peace to Afghanistan“ – преговори во кои тогашната авганистанска влада беше целосно исклучена.Денес, повторно сведочиме на состанок на кој засегнатата страна – овојпат Украина – не е присутна на масата, иако се дискутира за нејзината иднина.Симболиката е дополнително нагласена од фактот што денот на средбата меѓу Трамп и Путин се поклопува со четвртата годишнина од враќањето на Талибанците на власт. За многумина, ова предизвикува непријатна паралела: тогаш, кога талибанското раководство постигна договор со САД, нивната победа беше само прашање на време. Некои аналитичари предупредуваат дека Владимир Путин денес може да размислува на ист начин.
Свет | пред 7 месеци
Украинскиот претседател Володимир Зеленски порача дека состанокот меѓу американскиот претседател Доналд Трамп и рускиот лидер Владимир Путин во Алјаска е „потребен“, но повтори дека Украина мора да биде вклучена во мировните преговори за да се донесат „ефективни одлуки“.„Русија треба да ја заврши војната што самата ја започна,“ изјави Зеленски, потсетувајќи дека Киев не е поканет на денешниот состанок во Анкоридж.„Потребни се безбедносни гаранции. Потребен е траен мир. Сите ги знаат клучните цели. Сакам да им се заблагодарам на сите кои помагаат да се постигнат вистински резултати,“ напиша тој на мрежата Х.
Свет | пред 7 месеци
Додека Доналд Трамп и Владимир Путин накратко позираа за фотографија на подиум, новинарите ја искористија приликата да им упатат прашања.„Претседателе Путин, ќе се согласите ли на прекин на огнот?“, се слушна од толпата репортери. Друг новинар праша кој е ставот на Трамп за Путин.Последното прашање – „Ќе престанете ли да убивате цивили?“ – предизвика реакција, со тоа што рускиот претседател покажа со раката кон увото, гестикулирајќи дека не ги слуша прашањата.Двајцата лидери се повлекоа од платформата и заедно заминаа со ист автомобил кон местото на состанокот.
Свет | пред 7 месеци
Рускиот министер за надворешни работи Сергеј Лавров пристигна во Анкориџ, Алјаска, каде утре ќе се одржи самитот меѓу американскиот претседател Доналд Трамп и рускиот лидер Владимир Путин. При влегување во хотелот, Лавров кратко разговараше со новинарите, облечен во маица со натпис „СССР“ (советскиот акроним за Сојузот на Советските Социјалистички Републики).Тој изјави дека Москва на состанокот ќе изнесе „јасен и разбирлив став“ и дека во текот на неодамнешната посета на американскиот специјален пратеник Стив Виткоф на Москва, било постигнато „многу“.„Ние никогаш не правиме планови однапред. Знаеме дека имаме аргументи, јасен и разбирлив став. Тоа и ќе го презентираме,“ рече Лавров, додавајќи дека се надева утрешниот самит да продолжи со „корисниот разговор“ започнат со Виткоф.
Свет | пред 7 месеци
Додека американскиот претседател Доналд Трамп и рускиот лидер Владимир Путин се подготвуваат да слетаат во заедничката база Елмендорф–Ричардсон, 30 минути од Анкориџ, улиците во близина се исполнети со демонстранти и поддржувачи.„Путин треба да биде во затвор, а тој само така доаѓа на Алјаска,“ вели Хана Кореа, 40-годишна Украинка која се преселила во САД во 2019 година. Држејќи украинско знаме, таа признава дека се расплакала кога видела колку Американци даваат поддршка. „Тажно е што Зеленски не е поканет,“ додава таа.Во редовите на демонстрантите е и Кристофер Келихер, 53-годишен воен ветеран и жител на Алјаска: „Одвратно е… Путин не треба да е во нашата држава, а имаме идиот во Белата куќа кој ќе му се додворува.“Историјата на регионот со Москва додава тежина на средбата. Алјаска била купена од Русија во 1867 година за 7,2 милиони долари, а денес, руското културно наследство е видливо низ православните цркви. Во црквата „Свети Тихон“ во Анкориџ се одржуваат тридневни молитви, а свештеникот Николас Крегл вели: „Надеваме се оваа средба да донесе крај на конфликтот.“Меѓу поддржувачите е и рибарот Дон Кресли од градот Норт Пол: „Мислам дека е добра идеја. Би сакал да е и Зеленски тука… Трамп прави фантастична работа.“ Тој сака крај на војната „заради уништувањето на градовите и затоа што луѓето остануваат без домови, храна и средства за живот.“Сепак, напнатоста меѓу САД и Русија останува. Руски воени авиони често се пресретнувани во близина на алјасканскиот брег, а некои жители се чувствуваат изложени на ризик. „Живееме поблиску до Русија отколку до Вашингтон,“ вели Расел Вилсон од Анкориџ. „Ако претседателот не удри со тупаница по маса, би можеле да бидеме следната Украина.“
Свет | пред 7 месеци
Рускиот претседател Владимир Путин пристигна во рускиот град Магадан на Далечниот Исток, пред средбата со американскиот претседател Доналд Трамп во Алјаска, јавува дописникот на РИА Новости.Според портпаролот на Кремљ, Дмитриј Песков, претседателот ќе изврши увид во јавните работи и индустриските објекти во регионот, а ќе разговара и со гувернерот Сергеј Носов.„Потоа ќе оди во Алјаска и ќе започне руско-американската агенда“, рече тој.Растојанието меѓу Магадан и Анкориџ е околу три илјади километри, а времето на летот помеѓу градовите е околу четири часа.Според портпаролот на Кремљ, Јуриј Ушаков, Путин и Трамп ќе се сретнат во Анкориџ во петок во 22:30 часот по московско време (23:30 часот по македонско време). Самитот ќе се одржи во воената база Елмендорф-Ричардсон. Политичарите прво ќе разговараат лице в лице, потоа со учество на делегации, а разговорите ќе продолжат на работен појадок.Централната тема на средбата ќе биде решавањето на украинската криза, а страните ќе разменат мислења и за соработката меѓу Москва и Вашингтон. Лидерите ќе разговараат за задачите за обезбедување мир и безбедност, како и за прашања од меѓународната и регионалната агенда.Не се очекува потпишување документи за време на состанокот. Лидерите ќе зборуваат за постигнатите договори на заедничка прес-конференција.Објавен е распоредот на ТрампБелата куќа го објави распоредот на патувањето на американскиот претседател Доналд Трамп во Алјаска, за средба со рускиот претседател Владимир Путин.Шефот на Белата куќа наводно пристигнува во Анкориџ во 06:45 часот (12:45 часот по македонско време).„Во 11:00 часот по локално време (21:00 часот по македонско време), Трамп ќе учествува во билатерална програма со претседателот на Руската Федерација во Анкориџ“, се наведува во документот.Според распоредот, Трамп ќе го напушти градот во 21:45 часот (03:45 часот по македонско време).Според портпаролот на Кремљ, Јуриј Ушаков, лидерите ќе ги започнат своите разговори во 21:30 часот по московско време (22:30 часот по македонско време).Руската делегација ги вклучува министерот за надворешни работи Сергеј Лавров, помошникот на претседателот Јуриј Ушаков, министерот за одбрана Андреј Белошов, министерот за финансии Антон Силуанов и специјалниот претседателски претставник за инвестиции и надворешно-економска соработка Кирил Дмитриев.Централна тема на самитот Путин–Трамп ќе биде решавањето на украинската криза, но ќе се дискутираат и други теми. „Секако, ќе бидат опфатени пошироки задачи за обезбедување мир и безбедност, како и актуелни и најакутни меѓународни и регионални прашања“, нагласи Ушаков.Лидерите ќе разговараат и за билатералната соработка во економската сфера: „Забележувам дека оваа соработка има огромен, и за жал, досега неискористен потенцијал“.Сè уште не е јасно дали ќе се одржи заедничка прес-конференција, но сигурно е дека лидерите на двете земји ќе се обратат на печатот.Историска средба во Алјаска – Русите слетааПрвиот руски владин авион Ил-96, кој полета од московскиот аеродром Внуково, слета во Анкориџ, според податоците на Flightradar. Според руските медиуми, можно е во него да се наоѓа група што се подготвува за самитот меѓу рускиот и американскиот претседател Владимир Путин и Доналд Трамп.Втор авион со 52 руски новинари полета од Москва синоќа во 17:30 часот. Новинарите на аеродромот ги пречека Ил-96, во кој се наоѓаше рускиот министер за надворешни работи Сергеј Лавров. Меѓу патниците е и рускиот амбасадор во САД, Александар Дарчиев, кој тивко спомена дека се вратил од одмор.Новинарите ќе бидат сместени на стадионот „Сали“ во Анкориџ.Средбата меѓу рускиот и американскиот претседател Владимир Путин и Доналд Трамп во Алјаска ќе започне во 21:30 часот по московско време (22:30 часот по македонско време) со средба еден на еден, на која, освен лидерите, ќе учествуваат само преведувачи, изјави на брифинг помошникот на рускиот претседател Јуриј Ушаков. Двајцата претседатели ќе ги продолжат разговорите на работен појадок.
Свет | пред 7 месеци
Денешниот самит меѓу американскиот претседател Доналд Трамп и рускиот лидер Владимир Путин во Анкориџ, Алјаска, ќе ги седне двајцата на маса со спротивставени приоритети, но и со заедничка желба за меѓународно внимание.За Путин, самото одржување на средбата е победа – признавање дека обидите на Западот да го изолираат не успеале. Алјаска е внимателно избрана локација: без прелетување над „непријателски“ земји, далеку од Украина и Европа, со историска симболика за менување граници. Рускиот лидер инсистира на задржување на сите освоени територии во четири украински региони, иако Киев тоа го смета за неприфатливо.За Трамп, кој уште во кампањата ветуваше дека „ќе го заврши војната за неколку дена“, средбата е шанса да ја игра улогата на глобален миротворец – и можеби да се доближи до Нобелова награда за мир. Сепак, неговите изјави се колебливи: од нарекување на разговорите „слушателна сесија“ до оптимистички најави дека и Путин и Зеленски сакаат мир.Украина и европските сојузници стравуваат од можен „land-swap“ договор – територијални концесии во замена за прекин на огнот. За Путин, тоа би значело дипломатска победа; за Трамп – историски момент за кој ќе може да тврди дека донел мир. Но дали Киев би прифатил такво нешто останува неизвесно.„Мислев дека ова ќе биде најлесната војна за решавање“, призна Трамп во Овалната соба ден пред патувањето. „Излезе дека е најтешката.“
Свет | пред 7 месеци
Додека рускиот и американскиот претседател се подготвуваат да се сретнат во најголемиот град во Алјаска, на интернет повторно се појавија шпекулации дека Владимир Путин ја отфрла легитимноста на продажбата на Алјаска на САД од страна на Русија во 1867 година.Претседателите на САД, Доналд Трамп и на Русија, Владимир Путин ќе се сретнат во петок во воена база во најголемиот град во Алјаска, Анкориџ, за долгоочекувани разговори за руската инвазија на Украина. Локацијата на средбата е избрана од практични причини, објавува „Еуроњуз“.Алјаска и Русија се оддалечени само 90 километри, а Малиот Диомед на Алјаска е на помалку од четири километри од Големиот Диомед на Русија во Беринговиот Проток. Ова значи дека Путин може да пристигне на разговорите, избегнувајќи го воздушниот простор на западните земји кои би можеле да се обидат да го пресретнат неговиот лет за да спроведат потерница од Меѓународниот кривичен суд (МКС).Но, местото не е само практично, туку е и симболично. Алјаска некогаш била руска колонија. Во 1867 година, рускиот император Александар II ја продал на САД за 7,2 милиони долари за да помогне во отплатата на долговите настанати за време на Кримската војна од 1853-1856 година.Најголемата американска државаРусија не ја сметаше Алјаска за економски значаен дел од својата територија. Алјаска официјално беше прогласена за 49-та американска држава во 1959 година, а денес е најголемата од сите 50 американски држави.Путин ќе биде првиот руски претседател што ќе го посети Анкориџ. Средбата во Анкориџ повторно ги разгоре разговорите за Алјаска како „историска руска земја“, при што истакнати функционери на Кремљ го нагласија руското наследство и историјата на територијата. Теоријата дека Русија еден ден ќе ја врати таа американска федерална држава не е нова.Минатата година, идеолошката гласноговорничка на руската државна телевизија Олга Скабеева ја нарече таа американска територија „наша Алјаска“. Дмитриј Медведев, заменик-претседател на Рускиот совет за безбедност и поранешен руски претседател, се пошегува на социјалните мрежи за започнување војна со САД за територијата.Кирил Дмитриев, главниот преговарач на Кремљ, кој исто така раководи со Рускиот фонд за директни инвестиции, минатата недела изјави дека Алјаска е „руско-американска“ и посочи дека состанокот би можел да поттикне поблиска соработка меѓу Москва и Вашингтон на Арктикот.Дали Русија ја откажа продажбата на Алјаска?Постер од 2022 година со пораката „Алјаска е наша“, кој во тоа време предизвика негодување кај некои американски сенатори, исто така, повторно се појави. Постојат и шпекулации дека Москва презема чекори за враќање на таа територија.Шпекулациите беа поттикнати од тоа што Трамп ја помеша Алјаска со Русија на прес-конференцијата во понеделникот, кога рече дека ќе патува во „Русија“ за да се сретне со Путин, иако веќе ја потврди Алјаска како место на средбата.Некои корисници на социјалните медиуми пишуваа дека пресудата на рускиот Врховен суд од 2022 година ја поништи продажбата на Алјаска на САД во 1867 година. Сепак, сè уште не се објавени официјални судски документи за да се поддржи тоа тврдење. Други корисници го наведоа указот од 2024 година со кој наводно продажбата на Алјаска од 1867 година е прогласена за нелегална.Тој указ навистина постои. Тој е датиран на 18 јануари 2024 година и издвојува средства за пребарување, регистрација и правна заштита на руски историски средства во странство. „Еуроњуз“ ја провери неговата содржина и откри дека не ја споменува Алјаска.Сепак, аналитичарите веруваат дека Кремљ би можел да го искористи декретот за повторно отворање на историските спорови, не само во Алјаска, туку и во поранешните руски територии.
Свет | пред 7 месеци
Едно лице го загуби животот, а друго е тешко повредено во сообраќајна несреќа што се случила во раните утрински часови во близина на влезот на Националниот парк и резерват Денали во Алјаска.Несреќата се случила во петокот, на 1 август, околу 1 часот по локално време, на патот Денали Парк, во близина на 235-та милја од автопатот Џорџ Паркс (познат и како автопат Паркс), јужно од влезот на паркот.Според информациите на Националната служба за паркови, 24-годишен државјанин на Бугарија управувал со возилото кога удрило во елен. Тој починал на самото место.Во возилото се наоѓала и 24-годишна девојка од Македонија, која со тешки повреди била пренесена во болница во Фербанкс, на околу 190 километри оддалеченост.Од Националната служба за паркови изјавија дека овој трагичен случај е „тежок потсетник на опасностите што ги носи присуството на диви животни на патиштата во Алјаска“, особено во раните и доцните часови кога лосовите, карибуите и други крупни животни се најактивни и често тешко видливи.Службата додаде дека е во координација со бугарската амбасада за да ги извести најблиските роднини на починатиот, по што ќе биде објавен неговиот идентитет.фото: Unsplash
Македонија | пред 7 месеци
Американската крајбрежна стража во Алјаска синоќа пронашла остатоци од мал авион на замрзнат морски мраз, откако леталото ненадејно изгубило висина во четвртокот, при што загинале сите 10 лица во него, соопштија официјални лица.Двајца спасувачи на крајбрежната стража на САД кои стигнаа до урнатините можеа да видат три тела внатре, а другите седум се претпоставува дека се во урнатините, изјави портпаролот на крајбрежната стража Мајк Салерно на прес-конференција. „За жал, се чини дека не е несреќа што може да се преживее“, рече Салерно. Клинт Џонсон, шеф на канцеларијата на Националниот одбор за безбедност на транспортот на Алјаска, на истата прес-конференција рече дека 10 се мртви. „За жал, бидејќи остатоците се пронајдени и 10 луѓе загинаа, време е да ги засукаме ракавите и да се фатиме за работа“, рече Џонсон. Суровото зимско време ја отежна потрагата и може да бидат потребни часови или денови за да се извлечат телата од оддалечената локација, рекоа официјални лица.Остатоците се откриени на 55 километри југоисточно од Номе, соопшти крајбрежната стража во објавата која вклучува слика од остатоците во снегот и двајца членови на тимот за извлекување.
Свет | пред 1 година
Неколку часа откако републиканскиот кандидат, Доналд Трамп, победи на претседателските избори во САД, администрацијата на Џо Бајден го ограничи дупчењето нафта во Арктичкото национално прибежиште за диви животни на Алјаска. Дупчењето беше забрането со децении во Арктичкото прибежиште, недопрен регион во североисточна Алјаска, кој е дом на широк спектар на загрозени видови.Меѓутоа, законот донесен за време на првиот мандат на Трамп бараше од федералната влада да дозволи закуп на земјиште таму во два наврати за потребите на дупчење и експлоатација на нафта. Закупот првпат беше понуден во 2021 година, но на крајот беше суспендиран и откажан од Министерството за внатрешни работи поради недостаток на интерес од нафтената индустрија.Законот од ерата на Трамп бараше закупот повторно да се понуди пред крајот на 2024 година. Администрацијата на Бајден во средата објави дека на аукцијата ќе понуди околу 160.000 хектари, што е најмалата можна површина што може легално да ја понуди, пишува Си-ен-ен.Последниот потег наиде на различни реакции. „Денешната акција на администрацијата на Бајден подобро го заштитува Арктичккото прибежиште и ние сме благодарни за тоа. Борбата за спас на Арктичккото прибежиште започнува повторно и ние сме подготвени за следните четири години“, рече Кристен Милер, извршен директор на Лигата на дивината на Алјаска.Сепак, некои жители веруваат дека потегот на Бајден ќе и наштети на локалната економија, која во голема мера зависи од приходите од дупчење.
Свет | пред 1 година
Нашата веб-страница користи колачиња за подобрување на корисничкото искуство и анализа на сообраќајот.
Прв ќе ги дознаваш ударните и вонредните случувања
