РУСИЈА

Сателитски снимки откриваат ново руско воено засилување близу Финска

Русија започнала со обнова на напуштена воена база во градот Петрозаводск, во Република Карелија, во непосредна близина на границата со Финска, со цел таму да смести до 15.000 војници од новоформираниот 44. армиски корпус. Ова го покажуваат сателитските снимки што ги објави финската јавна телевизија Yle, а ги пренесуваат и повеќе меѓународни медиуми.Снимките го прикажуваат просторот на поранешниот гарнизон во близина на електраната Рибка, кој бил напуштен од почетокот на 2000-тите години. Локацијата сега е расчистена од ниска и висока вегетација, а до октомври минатата година биле забележани повеќе од 50 воени камиони и други возила. Во Петрозаводск веќе постојат голема воздухопловна база и магацин за воена опрема, а паралелно се градат и нови работилници и инфраструктура.Според информации од локални руски медиуми, изградбата на нови касарни во Петрозаводск треба да започне во текот на оваа година. Русија го формирала 44. армиски корпус во Карелија уште во 2024 година, со што биле додадени околу 15.000 војници. Дел од нив веќе пристигнале во градот, што ја објаснува потребата од забрзана изградба на објекти за сместување и обука.Воениот аналитичар и поранешен фински разузнавач Марко Еклунд за Yle изјавил дека постои голема веројатност овие сили да се обучуваат за испраќање на боиштето во Украина. Истовремено, се работи и на изградба на ново воено населено место во Кандалакша, во Мурманска област, што дополнително укажува на поширока воена активност во северозападниот дел на Русија.Во меѓувреме, Финска и Шведска на 27 септември минатата година формираа заедничка бригада со околу 5.000 војници, која ќе биде стационирана во Лапонија, долж границата со Русија. Финската воена разузнавачка служба на 22 јануари годинава соопшти дека Русија не се откажала од обидите за оштетување на подводната инфраструктура во Балтичко Море, што дополнително ги зголемува безбедносните грижи во регионот.

Свет | пред 1 месец

Кина директно го поттикнува најсмртоносното оружје на Путин

Кина испраќа клучна технолошка опрема што ѝ помага на Русија во развојот и производството на хиперсонични ракети со нуклеарни способности, оружје кое може да погоди цели во Европа за помалку од 20 минути. Станува збор за специјализирани CNC машини и други компоненти неопходни за изработка на боеви глави и прецизно наведувано оружје.Според „Телеграф“, Русија неодамна го употребила проектилот „Орешник“, кој достигнува брзина од околу 12.875 километри на час и може да носи шест боеви глави со различни цели. Украинските власти и безбедносни аналитичари предупредуваат дека станува збор за сериозна закана за Западот, додека Москва тврди дека ракетата е невозможно да се собори.Клучна улога во зголемувањето на производството има кинеска карусел-струг машина, идентификувана во руската фабрика во Воткинск, главен погон за производство на ракети, кој е под западни санкции. Таму, покрај „Орешник“, се произведуваат и „Искандер-М“ и интерконтиненталните ракети „Топол-М“.Анализите покажуваат дека Кина ѝ испорачала на Русија технологија и опрема во вредност од околу 10,3 милијарди долари, вклучувајќи микрочипови, мемориски плочки, куглични лежишта и компоненти за радари и електронско војување. Дел од овие производи се на списокот на високоприоритетни стоки чиј извоз во Русија е забранет од повеќе западни земји, но Кина не ги прифати тие санкции.Експертите оценуваат дека без пристап до кинеската технологија и пазар, Русија би имала сериозни тешкотии да го одржи темпото на военото производство и модернизацијата на одбранбената индустрија. Пекинг, пак, ги отфрла обвинувањата, наведувајќи дека не придонесува за ескалација на војната и не профитира од конфликтот во Украина.

Свет | пред 2 месеци

Путин се согласи на привремен прекин на огнот

Кремљ соопшти дека рускиот претседател, Владимир Путин, се согласил да ги запре нападите врз украинските градови до 1 февруари.Портпаролот на Кремљ, Дмитриј Песков, изјави дека американскиот претседател Доналд Трамп лично го замолил Путин да се воздржи од напади врз Киев една недела со цел да се создадат поволни услови за преговори.На прашањето дали Путин се согласува со предлогот, Песков одговори: „Да, секако. Тоа беше лично барање од претседателот Трамп“.Претседателот на САД вчера изјави дека неговиот руски колега се согласил со неговото барање да не се напаѓа Киев и другите украински градови и места една недела.„Јас лично го замолив претседателот Путин да не го напаѓа Киев и другите градови и места една недела“, рече Трамп на брифинг за медиумите, нагласувајќи дека Украина се соочува со екстремно ниски температури. „И тој се согласи. Морам да ви кажам, тоа беше многу убаво. Многу луѓе ми рекоа – не губете време на тој повик. Но, јас го направив тоа“, додаде тој.Претседателот на САД не разјасни кога или на кој начин го упатил тоа барање до Путин, ниту на кој датум треба да стапи на сила наводното прекин на огнот. Коментарите на Трамп, исто така, следеа по шпекулациите дека Киев и Москва се согласиле на пауза во нападите врз енергетската инфраструктура на другата страна, иако ниту една страна не ги потврди тврдењата ниту ја коментираше изјавата на Трамп.По објавата на Трамп, се огласи украинскиот претседател Володимир Зеленски.„Важна изјава од американскиот претседател за можноста за обезбедување безбедносна заштита на Киев и другите украински градови во текот на овој екстремен зимски период. Снабдувањето со електрична енергија е основа на животот. Ги цениме напорите на нашите партнери кои ни помагаат да ги заштитиме животите. Ви благодариме, претседателе Трамп! Нашите тимови разговараа за ова во Обединетите Арапски Емирати. Очекуваме спроведување на постигнатите договори. Чекорите кон деескалација придонесуваат за вистински напредок кон завршување на војната“, напиша Зеленски

Свет | пред 2 месеци

„Путин не го повикал Зеленски и не му понудил никакви средби“, вели Песков

Рускиот претседател Владимир Путин не го повикал украинскиот претседател Володимир Зеленски никаде, ниту му понудил средби, изјави денес портпаролот на Кремљ, Дмитриј Песков.„Путин не го повикал Зеленски проактивно никаде и не му понудил никакви средби. Ги гледавме и слушнавме и овие изјави. Многу изјави имаше изминатите денови, всушност, изминатите часови“, рече Песков на новинарите, одговарајќи на прашањето каква е реакцијата на Кремљ на повикот што Зеленски во видео-изјава му го упати на Путин за непосредна средба на мировни преговори во Киев, пренесува агенцијата РИА Новости.Зеленски претходно денес во видео-изјава објави дека е подготвен за средба со Путин во Киев, на што помошникот на рускиот претседател Јуриј Ушаков рече дека Путин повеќепати претходно изјавил дека Зеленски може да дојде во Москва, ако е отворен за дијалог.Украинскиот претседател денес изјави дека е подготвен за средба со рускиот претседател Владимир Путин во рамки на мировните преговори, но ја исклучи можноста таквата средба да се одржи во Москва или Белорусија, повикувајќи го Путин да дојде во Киев „ако смее“.„Апсолутно е невозможно да се сретнам со Путин во Москва. Тоа би било исто како средба со Путин во Киев. Може исто така да го повикам во Киев – нека дојде. Јавно го повикувам, ако смее, секако“, рече Зеленски, пренесе Униан.

Свет | пред 2 месеци

Руски амбасадор до Американците: „Трипати мери и не сечи“

Рускиот амбасадор при Обединетите нации, Василиј Небенџа, им даде совет на Американците во врска со можен американски напад врз Иран: „трипати мери и не сечи“.„Трипати мери и не сечи“, порача Небенџа, нагласувајќи дека Соединетите Американски Држави можат да го нападнат Иран, но дека Техеран сега е подобро подготвен за тоа отколку што беше во јуни 2025 година.Небенџа истакна дека реториката на американскиот претседател Доналд Трамп за Иран во извесна мера се смирила откако завршија протестите во таа земја, но ситуацијата сепак е загрижувачка.„Нападот може да се изведе, но Иран овојпат е подобро подготвен за таков развој на ситуацијата отколку што беше во јуни“, рече Небенџа за руските медиуми.Американските медиуми пренесоа дека Трамп размислува за нов голем удар врз Иран откако претходните разговори меѓу Вашингтон и Техеран за ограничување на иранскиот нуклеарен програм и производство на балистички ракети не напредуваа.Опциите што Трамп сега ги разгледува, вклучуваат американски воздушни напади насочени кон иранските лидери и безбедносни функционери за кои се верува дека се одговорни за убиства за време на протестите во земјата, како и напади врз иранските нуклеарни објекти и владините институции, изјавија извори за Си-Ен-Ен.Ударната група носачи на авиони „USS Abraham Lincoln“ влезе во Индискиот Океан пред три дена и продолжува да се приближува кон Иран.

Свет | пред 2 месеци

Зеленски ја одби Москва: Нека дојде Путин, ако смее!

Украинскиот претседател изјави дека не било склучено директно договор со Русија за енергетските удари.„Ако престанат да ја напаѓаат нашата инфраструктура, ние нема да ја нападнеме нивната“, рече тој.Исто така, тој ја одби руската покана да отпатува во Москва, исклучувајќи ја и Белорусија како можно место за средба со Путин.Наместо тоа, Зеленски го повика рускиот лидер во Киев, додавајќи „Aко смее, секако“.

Свет | пред 2 месеци

Завршена продажбата на еден од најголемите руски аеродроми

Подружницата на Меѓународниот аеродром Шереметјево „Перспектива“ го купи аеродромот Домодедово на аукција за 66,133 милијарди рубљи (околу 738 милиони евра), објави „Комерсант“.Продажбата беше спроведена како холандска аукција, со претходно објавена максимална цена.Потоа беше утврдено намалување на цената за 10 отсто, по што аеродромот беше продаден по минималниот износ.Првично беа поднесени пет понуди за купување на Домодедово, но три беа дисквалификувани, па на крајот во аукцијата, покрај Шереметјево, учествуваше само уште аеродромот Внуково.Руското Министерство за сообраќај соопшти дека е задоволно од резултатите на тендерот.„Од големо значење за транспортната индустрија е што искусен сопственик го презема управувањето со еден од најголемите руски аеродроми“, се наведува во соопштението.Аеродромите Шереметјево и Домодедово се наоѓаат во Московската област.

Свет | пред 2 месеци

Украинските сили уништија руски радар вреден околу 100 милиони долари

Украинските вооружени сили уништија модерен руски радарски систем од типот „Небо-СВУ“, чија вредност се проценува на околу 100 милиони долари, а во одвоени напади беа погодени и неколку руски контролни пунктови за беспилотни летала. Генералштабот на Вооружените сили на Украина соопшти дека радарот бил погоден во близина на селото Лимаривка, во окупираниот дел од Луганската област, објави „Кијив пост“.Станува збор за радарски систем наменет за противвоздушна одбрана на копнените сили, кој руската армија го користи од 2017 година. Според украинските процени, една единица од овој систем чини околу 100 милиони долари. „Небо-СВУ“ се одликува со целосно дигитална обработка на сигналот, висока отпорност на електронско попречување и способност за откривање летала со намалена радарска видливост, со радарски одраз од 0,1 квадратен метар, на далечина до 100 километри.Според претходни информации објавени од „Дифенс експрес“, руската страна тврди дека радарот може да открива цели на далечина до 360 километри доколку летаат на височина од 20 километри. Тој домет се намалува на околу 270 километри за цели на височина од 10 километри, односно на приближно 60 километри за летала што се движат на височина од околу 500 метри. Истовремено се посочува дека, иако руските извори често ја нагласуваат теоретската способност на системот да детектира и летала со стелт-карактеристики, прецизноста на откривањето во тој радарски опсег е релативно ниска.Генералштабот на Украина информираше и за напади врз неколку руски контролни пунктови за дронови, лоцирани во близина на населбите Солодке, Ривнопиље и Новохрихоривка во окупираниот дел од Запорошката област, како и кај Пидстепне во Херсонската област. Во исто време било погодено и складиште за муниција во близина на Василивка, исто така во Запорошката област. Украинската војска ги потврди ударите и наведе дека обемот на руските загуби сè уште се утврдува.

Свет | пред 2 месеци

Русија тврди: НАТО се подготвува за војна

Северноатлантскиот сојуз се подготвува за конфликт со Русија, изјави во интервју за TASS Владислав Маслеников, директор на Одделот за европски прашања при Министерството за надворешни работи на Русија.„Русија моментално е дефинирана како ‘најзначајна и најдиректна безбедносна закана’ во сите доктрински документи на НАТО, бидејќи блокот нагласува дека таквата закана ќе остане долгорочно, дури и ако конфликтот во Украина се реши“, рече висок руски дипломат, одговарајќи на прашањето дали Русија и НАТО би можеле да го обноват дијалогот сега или во иднина.„Имајќи го ова предвид, НАТО всушност се подготвува за потенцијален конфликт со Русија со зголемување на воените расходи, градење на своите капацитети долж нашите граници и распоредување дополнителни мисии и операции во Источна Европа“, објасни Маслеников.Дипломатот потсети дека на 15 ноември минатата година германскиот министер за одбрана Борис Писториус изјавил во интервју за „Frankfurter Allgemeine Zeitung“ дека војна помеѓу Русија и НАТО наводно би можела да започне пред 2029 година. На неговата изјава, портпаролката на руското МНР Марија Захарова одговори дека веќе нема сомнеж кој е агресор. Рускиот министер за надворешни работи Сергеј Лавров додаде дека Писториус ќе мора да живее со изјавата дека војната помеѓу НАТО и Русија е „неизбежна“.Маслеников истакна дека меѓу Русија и НАТО останал само канал за итна комуникација откако Северноатлантскиот сојуз го прекина контактот со земјата.„Алијансата го прекина секој контакт со нас во 2022 година. Остана само канал за комуникација во итни случаи“, рече висок руски дипломат.Според него, НАТО всушност самоволно го замрзнал дијалогот со Русија уште во 2014 година. „Можевме да разговараме за одредени прашања, но НАТО сè сведоа на прашањето Украина. Нашите иницијативи за деескалација на воените тензии во Европа не беа ценети“, истакна тој.Маслеников додаде дека Русија се обидела да иницира дијалог за меѓусебни безбедносни гаранции. „Предложивме нацрт на такви договори во декември 2021 година, но не добивме позитивен одговор.“

Свет | пред 2 месеци

Норвешкиот министер за одбрана: Руските ракети можат да стигнат до САД за 18 минути

Норвешкиот министер за одбрана, Торе Сандвик, предупреди дека арктичкиот регион станува клучна зона за стратешко надминување меѓу НАТО и Русија. Тој укажа на Кола, рускиот полуостров со еден од најголемите нуклеарни арсенали, од каде интерконтиненталните балистички проектили до американските градови стигнуваат за околу 18 минути.Русија, која контролира половина од копнениот и воден арктички простор, има над 40 воени објекти и ја модернизира Северната флота и нуклеарните подморници. Во октомври минатата година тестираше и крстосувачка ракета на нуклеарен погон на Новата Земја.Нордиските земји повикуваат на поголем ангажман на НАТО во Арктикот, а САД, Велика Британија и Франција веќе ги зголемија обуките за арктички операции. Во март ќе се одржи вежбата Cold Response во северна Норвешка со околу 25.000 војници.Два клучни морски пролази каде би се НАТО и Русија судриле за контрола: преминот меѓу Гренланд, Исланд и Обединетото Кралство (GIUK) и арктичкиот морски премин кај Свалбард.И покрај воените активности, нордиските официјални лица нагласуваат дека приоритет мора да останат климатските промени, инфраструктурата и правата на автохтоните народи. Русија и Кина, пак, гледаат на Арктикот како долгорочна стратегиска зона за надминување и економска експанзија.

Свет | пред 2 месеци

(Видео) Руски дрон погоди патнички воз, загинаа цивили: Зеленски – ова е тероризам

Русија во текот на ноќта изврши масовен напад со дронови врз Украина, при што низ целата земја загинаа најмалку дванаесет лица. Во Харковска област беше погоден патнички воз, при што животот го загубија пет лица, додека во нападите врз Одеса и околината на Киев се забележани нови цивилни жртви. Претседателот на Украина, Володимир Зеленски, нападот врз возот го оцени како „терористички чин“, пренесува Euronews.Нападот врз патничкиот возНајмалку пет лица загинаа откако руски дрон во ноќта на вторник го погоди патничкиот воз во Харковска област. Претседателот Зеленски објави кратко видео од еден од запалените вагони на својот профил на социјалната мрежа X, а регионалните служби за итни случаи подоцна соопштија дека пожарот е изгаснат.„Убиството на цивили во вагон на воз нема и не може да има никакво воено оправдување. Во возот се наоѓаа повеќе од 200 патници, од кои 18 беа во вагон погоден од рускиот дрон“, напиша Зеленски.„Русите значително ја зголемија својата способност да убиваат и тероризираат“, додаде тој, повторувајќи ја потребата од посилен притисок врз Москва, што е порака која редовно ја упатува кон своите сојузници.Погодена е и ОдесаВо нападот со повеќе од 50 руски дронови беше погоден и црноморскиот град Одеса, каде според официјалните извештаи загинаа три лица, а повеќе од 30 се повредени, вклучувајќи и две деца. Цел на нападот беше градската електроенергетска мрежа, која Русија редовно ја напаѓа за да го прекине снабдувањето со струја и греење во зима, како и пет станбени згради.Според украинските власти, меѓу дроновите користени во нападот врз овој јужен град биле и модели кои Русија неодамна ги надградила за да ја зголеми нивната дострелност и ударна моќ.Жртви и во околината на КиевРусија целела и кон Киев, кој во последните месеци е изложен на сè почести напади. Во нападот загинале најмалку две лица.„Во населбата Билохородка во нападот загинаа двајца наши сограѓани, маж и жена“, објави на Телеграм началникот на воената управа на Киевската област, Никола Калашник.Според украинската национална полиција, четиригодишното дете на загинатите преживеало, но е повредено во нападот, додека три други лица се исто така повредени.

Свет | пред 2 месеци

Сикорски го повика Маск да спречи Русија да користи Starlink

Полскиот министер за надворешни работи, Радослав Сикорски, го повика основачот и извршен директор на SpaceX, Илон Маск, да спречи Русија да ги користи сателитите Starlink за напади врз украинските градови.„Здраво, Илон Маск, зошто не ги спречиш Русите да користат Starlink за напади врз украинските градови? Печалењето пари од воени злосторства може да му наштети на твојот бренд“, напиша Сикорски на социјалната мрежа X.

Свет | пред 2 месеци

Осудените за нападот на Кримскиот мост до Путин, Трамп и Зеленски: ‚Невини сме‘“

Осум мажи, кои рускиот суд ги осуди на доживотен затвор за учество во нападот на Кримскиот мост во 2022 година, поднесоа заеднички апел за ослободување, тврдејќи дека не биле свесни за операцијата што ја планирал Киев. Во експлозијата загинаа пет лица, а мостот, изграден по анексијата на Крим од Русија во 2014 година, претрпе сериозни оштетувања и стана симбол на амбициите на рускиот претседател Владимир Путин.Во апелот испратен до Путин, американскиот претседател Доналд Трамп и украинскиот претседател Володимир Зеленски, осудените ги опишуваат себеси како „осум обични луѓе кои секојдневно се буделе за да заработат за леб, да ја платат киријата и да ги прегрнат своите деца“, нагласувајќи дека сега се прогласени за „терористи“ и се соочуваат со сурова казна во руски затвори.Некои од осудените учествувале во транспорт на градежен материјал, за кој подоцна се покажало дека содржи скриен експлозив, но тие тврдат дека за тоа не знаеле. Украинските власти потврдија дека за операцијата биле користени лица кои „не биле упатени“, а организации за човекови права велат дека мажите само го извршувале својот вообичаен дневен работен ангажман.Меѓу осудените се логистички директор од Санкт Петербург, земјоделци и трговци со овошје од окупираната Украина и возач на камион. Сите тврдат дека учествувале во редовен транспорт и биле невини во врска со експлозивот.

Свет | пред 2 месеци

Генералниот директор на СЗО во Русија: „Вакцините против рак и ХИВ имаат шанси за успех“

Вакцините за третман на рак и HIV се ветувачки и имаат реални шанси за успех, изјави Батир Бердикличев, шеф на канцеларијата на Светската здравствена организација (СЗО) во Русија.– Веруваме дека mRNA вакцините за терапија на рак претставуваат иновативна и ветувачка платформа. Раните клинички испитувања покажуваат дека овие вакцини можат да го стимулираат имунолошкиот систем и да дадат позитивни резултати кај одредени видови рак – истакна Бердикличев за TASS.Тој посочи дека науката за вакцините се развива исклучително брзо во многу земји, но дека повеќето досегашни податоци се сè уште претпоставки или се однесуваат на мали групи пациенти.– Потребни се поголеми и долгорочни испитувања за да се потврди ефикасноста на mRNA вакцините кај различни видови рак. Во моментот, СЗО нема одобрени вакцини за лекување на рак – додаде тој.Во однос на HIV, истражувањата за вакцини се сè уште во развој и тестирање. Меѓутоа, во 2025 година, СЗО препорача употреба на нов лек, ленкапавир, како инекции два пати годишно за дополнителна превенција на HIV инфекција, што значително ја олеснува заштитата кај изложените лица.

Свет | пред 2 месеци

Русија и Украина во активен дијалог за нова размена на затвореници

Русија и Украина моментално водат активен дијалог за бројот на лица кои ќе бидат вклучени во новата размена и за организациските детали, соопшти руската комесарка за човекови права Татјана Москалјкова.„Во моментов се води активен дијалог во врска со бројот на лица кои ќе учествуваат во размената и организациските прашања. Се надевам дека оваа размена на затвореници наскоро ќе се одржи“, изјави Москалјкова за новинарите, пренесува TASS.Таа предложи и да се испита можноста за отворање контролен пункт помеѓу Русија и Украина за спојување на семејства и враќање на лица со истечени пасоши.Минатата година, Русија и Украина одржаа низа состаноци во Истанбул на 16 мај, 2 јуни и 23 јули. По последниот состанок, страните се согласија да продолжат со размена на тешко повреден и болен персонал, затвореници, како и тела на загинати војници и цивили.Трилатералните преговори меѓу САД, Русија и Украина ќе продолжат в недела, на 1 февруари во Абу Даби, јави порталот Axios, повикувајќи се на изјава на американски официјален претставник.

Свет | пред 2 месеци

Песков: Грешка е што ја демонзираат Русија

Портпаролот на рускиот претседател, Дмитриј Песков, изјави дека Полска и балтичките земји поради некои причини се плашат од Русија и ја демонзираат, што според него претставува голема грешка.Тој нагласи дека постојат земји со кои Русија со векови има „дефицит на пријателски чувства“.„Да ја земеме на пример, Полска. Навистина имаме проблеми со Полска. Навистина имаме проблеми со Балтикот. Од некоја причина, тие постојано се плашат од нас и не демонзираат. Секој што таму ќе дојде на власт започнува да ја мрази Русија и Русите“, рече Песков во коментар за новинарот на Лајф, Александар Јунашев, пренесува ТАСС.Според него, таквиот став кон Русија е голема грешка.„Овие земји би можеле многу да научат од руската култура и интеракција со Русија“, додаде Песков.

Свет | пред 2 месеци

Кремљ позитивно ги оценува преговорите во Абу Даби – продолжуваат следната недела

Портпаролот на рускиот претседател, Дмитриј Песков, изјави дека Кремљ ги оценува како позитивни првите преговори меѓу претставници на Русија, САД и Украина во Абу Даби.„Не би рекол дека таму имаше пријателство, тоа е тешко можно во моменталната фаза. Би било погрешно да се очекува голема ефикасност од првите контакти. На дневен ред беа сложени прашања. Но, ако се обидувате нешто да постигнете преку преговори, тогаш неопходно е да се води конструктивен дијалог“, истакна Песков.Преговорите во Абу Даби се однесуваа на териториите во Донбас и нуклеарната електрана Запорожје. Песков додаде дека „продолжувањето на преговорите е планирано за следната недела“.Москва не планира јавни дискусии за поединечни прашања што биле разгледувани, а за Русија принципијално значење има територијалното прашање, кое е дел од формулата договорена во Анкоридж.Преговорите се одржаа зад затворени врати, а руската работна група ја предводеше началникот на Главната управа на Генералштабот, адмирал Игор Костјуков. САД, според помошникот на претседателот Јуриј Ушаков, признаа дека без решавање на територијалното прашање не може да се очекува долгорочно решение. Воените сили на Украина треба да се повлечат од Донбас, што е важен услов за Москва.

Свет | пред 2 месеци

Русија: Украина направи терористички напад додека траеја преговорите во Абу Даби

Руското Министерство за надворешни работи соопшти дека најостро го осудува, како што наведува, терористичкиот напад извршен од украинската војска врз цивили во Херсонската област, тврдејќи дека инцидентот се случил во момент кога во Абу Даби се одржувале трилатерални разговори меѓу Русија, Соединетите Американски Држави и Украина.Портпаролката на руското Министерство за надворешни работи, Марија Захарова, изјави дека нападот бил извршен со беспилотно летало и дека цел на нападот било амбулантно возило во кое се наоѓале здравствени работници. Според нејзините тврдења, во нападот загинале три лица од медицинскиот персонал.Захарова посочи дека инцидентот се случил на територијата на Херсонската област и дека времето на нападот, додека траеле меѓународни преговори во главниот град на Обединетите Арапски Емирати, претставува свесна ескалација на конфликтот.„Киевските власти и нивните вооружени формации повторно извршија брутално злосторство врз цивили. Ваквите дејствија покажуваат неодговорен однос кон иницијативите насочени кон смирување на кризата и изнаоѓање политичко решение“, изјави Захарова.Таа најави дека лицата одговорни за нападот ќе бидат идентификувани и изведени пред лицето на правдата, притоа повикувајќи ја меѓународната заедница јасно и недвосмислено да го осуди, како што наведе, нападот врз медицински персонал и цивилна инфраструктура.

Свет | пред 2 месеци

Украина обвинува: Русија изврши масовен ракетен напад додека траеја мировните разговори во Абу Даби

Украинскиот министер за надворешни работи Андриј Сибиха остро го обвини рускиот претседател Владимир Путин дека „цинично“ наредил масовен ракетен и дронски напад врз Украина токму во моментот кога во Абу Даби се одржувале мировни разговори меѓу делегациите на Украина, Русија и САД, со посредство на Вашингтон.„Овој варварски напад уште еднаш покажува дека местото на Путин не е во мировен процес, туку на обвинителна клупа пред специјален суд“, напиша Сибиха на социјалната мрежа Икс.Русија во раните утрински часови во саботата изврши повеќекратни воздушни напади врз двата најголеми украински града – Киев и Харкив. Во нападите загина едно лице, а најмалку 23 лица се повредени.Украинските воздухопловни сили соопштија дека Русија лансирала вкупно 375 беспилотни летала и 21 ракета. Мета повторно била енергетската инфраструктура, при што во големи делови од главниот град беа прекинати снабдувањето со електрична енергија и греењето.Украинскиот претседател Володимир Зеленски во петокот изјави дека е прерано да се извлекуваат заклучоци по првиот ден од разговорите во Абу Даби и ја повика Русија конкретно да покаже дека е подготвена за завршување на војната. Се очекува разговорите да продолжат и во сабота, што е предвидено да биде нивниот последен ден.Во пресрет на средбите, портпаролот на Кремљ, Дмитриј Песков, повтори дека Русија не отстапува од барањето Украина да го предаде целиот источен регион Донбас, кој ги опфаќа областите Доњецк и Луганск. Токму ова прашање се смета за главната пречка за каков било договор.Барањето на Путин Украина да се повлече и од деловите на Доњецк што сè уште се под контрола на Киев – околу 20 проценти од регионот, или приближно 5.000 квадратни километри – Зеленски категорично го отфрла. Украинскиот претседател нагласува дека нема да отстапи територии кои Русија не успеала да ги освои во речиси четиригодишната војна.Анкетите во Украина покажуваат минимална поддршка меѓу граѓаните за какви било територијални отстапки. Иако Москва тврди дека сака дипломатско решение, паралелно продолжува да ги остварува своите цели со воени средства.Според украинските власти, пред последниот напад Киев веќе бил погоден од два масовни ноќни напади од почетокот на годината, кои оставиле стотици станбени згради без струја и греење. Заменик-премиерот на Украина изјави дека по најновиот напад, во услови на температури од околу минус 10 степени Целзиусови, дури 800.000 жители на Киев останале без електрична енергија.

Свет | пред 2 месеци

Зеленски: Не сме да се затвораат очи пред овие напади – Русија мора да добие силен одговор

Украинскиот претседател Володимир Зеленски соопшти во објава на социјалната мрежа Икс дека во ноќешниот напад врз Киев загинало едно лице, а десетици биле повредени, меѓу кои и дете, при што биле оштетени породилиште и студентски дом.„Русија во текот на ноќта изврши масовен напад врз нашите региони, лансирајќи повеќе од 370 јуришни дронови и 21 ракета од различни типови. Мета беа Киев и неговата околина, како и Сумската, Харковската и Черниговската област. Во Харков беа оштетени породилиште, студентски дом во кој се сместени раселени лица, медицински факултет и станбени згради. Досега е пријавено дека се повредени десетици луѓе, меѓу кои и дете“, наведе Зеленски.Тој додаде дека, за жал, во нападот загинало едно лице и изрази сочувство до семејството и најблиските. Зеленски истакна дека мета биле и енергетски објекти и дека сите надлежни служби се на терен и работат на санирање на последиците, меѓу кои спасувачките екипи, медицинските служби, општинските служби, енергетските работници и екипите за поправки.Украинскиот претседател им се заблагодари на сите што учествувале во одбраната и посебно на припадниците на противвоздушната одбрана кои го одбиле нападот, а воедно упати повик до меѓународните партнери на Украина.„Секој ваков руски напад врз нашата енергетска инфраструктура докажува дека не смее да има одложувања во испораката на противвоздушна одбрана. Не смеат да се затвораат очите пред овие напади – тие мора да добијат силен одговор. Сметаме на реакцијата и помошта од сите наши партнери. Секоја ракета за системите Patriot, NASAMS и другите системи помага во заштитата на критичната инфраструктура и им овозможува на луѓето да го издржат зимското студенило“, порача Зеленски, додавајќи дека мора целосно да се спроведе сè што било договорено со американскиот претседател Доналд Трамп во Давос во врска со противвоздушната одбрана.

Свет | пред 2 месеци

Руски дрон погоди автомобил кај Харков, три лица загинаа

Во напад со руски дрон врз цивилен автомобил во близина на селото Прудианка во Харковска област загинаа три лица, соопшти Олег Синегубов, началник на Харковската областна воена администрација.Првично беа пријавени две загинати лица и четири повредени жени, кои се префрлени во болница и добиваат соодветна медицинска помош. Подоцна беше потврдено дека уште една жена подлегнала на повредите.Во изминатите 24 часа под руска огнена активност се нашле седум населени места во регионот, при што пет лица се повредени.

Свет | пред 2 месеци

Песков: Повлекувањето од Донбас е клучен услов за завршување на конфликтот

Русија денеска соопшти дека и натаму бара Украина да ги повлече своите вооружени сили од источниот дел на земјата како предуслов за решавање на конфликтот, во пресрет на разговорите во Абу Даби меѓу руски, украински и американски претставници.Украинскиот претседател Володимир Зеленски изјави дека територијалното прашање останува главната нерешена точка и дека ќе биде на дневен ред на преговорите што ќе се одржат во петок и сабота. Ова ќе бидат првите директни разговори меѓу Москва и Киев поврзани со американскиот план за надминување на конфликтот.Портпаролот на руското претседателство, Дмитриј Песков, изјави дека повлекувањето на украинските сили е суштински услов. „Украинските вооружени сили мора да го напуштат Донбас, мора да се повлечат. Ова е многу важен услов“, порача Песков, додавајќи дека без решавање на територијалното прашање е бесмислено да се очекува склучување долгорочен договор.Русија бара повлекување на украинските сили од Донбас, индустриски и рударски регион во источна Украина кој ги опфаќа областите Доњецк и Луганск. Нејзините барања особено се однесуваат на Доњецката област, која Русија делумно ја контролира и која и натаму останува епицентар на борбите.Средбата во Абу Даби треба да се одржи еден ден по две средби на највисоко ниво – разговорите во Давос меѓу Зеленски и американскиот претседател Доналд Трамп, како и средбата во Москва меѓу рускиот претседател Владимир Путин и американските пратеници Стив Виткоф и Џаред Кушнер.

Свет | пред 2 месеци

Би-Би-Си: Клучен момент за Украина во напорите за мир

Украина се наоѓа во клучен и чувствителен момент, во кој максимално се ангажира и демонстрира подготвеност за соработка додека Белата куќа на Доналд Трамп ги предводи напорите за постигнување мир, оценува BBC во својата анализа.Како што наведува Би-Би-Си, Киев практично нема друг избор освен да настапува конструктивно, бидејќи без американска поддршка не може ефикасно да се брани од руската агресија. Затоа, за Украина е од суштинско значење да го задржи претседателот Трамп на своја страна.Иако украинската страна искрено посакува крај на борбите, од перспектива на Киев, првите трипартитни разговори претставуваат вистинска пресвртница. Во нивниот фокус ќе бидат американските безбедносни гаранции за Украина, како и можноста, според зборовите на украинскиот претседател Володимир Зеленски, да се утврди дали Москва навистина е сериозна кога зборува за мир или само тактизира.Украина, како што оценува Би-Би-Си, повеќе наклонува кон второто сценарио. По речиси четири години војна од целосен обем, руските ракетни и беспилотни напади повторно се интензивирани и сè почесто се насочени кон цивилната енергетска инфраструктура.Среде суровата зима, рускиот претседател Владимир Путин, според анализата, се обидува да ја скрши Украина преку студот и енергетскиот притисок.Сепак, во рамки на преговорите, најголемата јавна пречка останува прашањето за територијата, односно руското барање Украина да отстапи области кои Русија не успеа да ги освои на бојното поле. Политичарите често зборуваат за „црвени линии“, а според Зеленски, една таква јасна линија е источниот регион Донбас, која Украина, како што нагласува тој, нема намера да ја премине.

Свет | пред 2 месеци

Непланирано слетување над Кина: Руски авион со 238 патници безбедно приземјен во Ланџоу

Руски патнички авион со 238 патници, кој сообраќал на релација Пукет–Барнаул, безбедно слета на аеродромот во Ланџоу, Кина, соопшти авио-компанијата, пренесува ТАЊУГ.„Во авионот што се подготвуваше за непланирано слетување во Ланџоу, Кина, се наоѓаа 238 патници“, претходно изјави портпарол на компанијата „Азур Ер“ за агенцијата РИА Новости.„Азур Ер“ е руска авио-компанија со седиште во Москва. Компанијата соопшти дека е во постојан контакт со руските воздухопловни власти, како и со свој претставник во Кина, со цел целосно да се координира постапката околу слетувањето и безбедноста на патниците.

Свет | пред 2 месеци

Германија го протера заменикот на рускиот воен аташе

Германија го повика рускиот амбасадор на информативен разговор поради апсењето на осомничена руска шпионка, а истовремено донесе одлука за протерување на руски дипломат кој, според истрагата, ѝ служел како контакт. Од германското Министерство за надворешни работи порачаа дека ваквото постапување е директен одговор на, како што го оценија, агресивното дејствување на Русија.Министерот за надворешни работи Јохан Вадефул изјави дека Германија нема да толерира шпионажа на своја територија, особено кога во такви активности се вклучени лица со дипломатски статус, нагласувајќи дека ваквите постапки мора да имаат конкретни последици.Германските власти соопштија дека Илона В., германско-украинска државјанка, била уапсена поради сомнение дека шпионирала за руската воена разузнавачка служба ГРУ. Како нејзина контактна точка е наведен заменикот на воениот аташе на Русија во Берлин, на кого осомничената му доставувала информации поврзани со воените активности во Германија, со посебен фокус на состојбите поврзани со војната во Украина.Според истрагата, Илона В. во повеќе наврати му овозможила на рускиот дипломат пристап до различни политички настани користејќи лажен идентитет. Информациите за активностите на Бундесверот ги добивала преку двајца поранешни припадници на германските вооружени сили, против кои исто така е покрената истрага.Германските безбедносни служби наведуваат дека од почетокот на руската агресија врз Украина, Москва значително ги интензивирала своите разузнавачки активности во Германија, особено во рамки на таканареченото хибридно водење војна и шпионажа, што, според Берлин, претставува сериозна закана за националната безбедност.

Свет | пред 2 месеци