Пентагон во нападот на 28 февруари 2026 година во Иран користел нов, борбено недоволно проверен балистички проектил, при што биле погодени цивилни објекти, покажува анализа објавена од The New York Times.
Според објавата, станува збор за проектил од типот Precision Strike Missile (PrSM), кој детонира во воздух и распрснува волфрамови кугли, предизвикувајќи сериозни оштетувања на широка површина. Нападот бил изведен во градот Ламард, во близина на комплекс на иранската Револуционерна гарда, но погодени биле спортска сала и основно училиште.
Видео и фото-доказите анализирани од медиумот и експерти за вооружување покажуваат дека експлозиите се случиле непосредно над објектите, со карактеристични оштетувања од шрапнели. Во моментот на нападот, во спортската сала тренирала женска одбојкарска екипа, додека училиштето било во редовна употреба.
Според иранските извори, во нападите загинале најмалку 21 лице, а околу 100 се повредени, меѓу нив и деца и спортисти.
Американски официјален претставник, под услов на анонимност, потврдил дека во нападот бил користен токму PrSM – проектил кој дури неодамна го завршил тестирањето и првпат бил употребен во реални борбени услови. Адмиралот Бред Купер претходно потврди дека новото оружје е користено во првите денови од конфликтот.
Експертите предупредуваат дека поради новината на системот, не може со сигурност да се утврди дали погодените цивилни цели се резултат на грешка во изборот на мета, технички недостаток или намерен удар.
Од американската војска велат дека ги истражуваат наводите, нагласувајќи дека нивните сили не таргетираат цивили ниту дејствуваат неселективно.
Нападот во Ламард се случил на самиот почеток на војната меѓу САД, Израел и Иран, во која, според американските воени извори, биле погодени илјадници цели, со операции што се одвиваат во повеќе домени – воздух, копно, море и сајбер-простор.
