Американските сили ја интензивираат кампањата против иранските воени капацитети, фокусирајќи се на уништување на подземните бункери во кои се складираат ракети и дронови – клучниот адут на Техеран во актуелниот конфликт.
И покрај тоа што досега биле погодени околу 8.000 цели, иранските напади со балистички ракети и беспилотни летала продолжуваат, што укажува дека значителен дел од арсеналот останува функционален.
Поради ограничените воздушни и поморски капацитети, Иран својата стратегија ја темели токму на ракети и дронови, кои со години ги складира во длабоки подземни комплекси и планински засолништа. Оваа инфраструктура го отежнува нивното уништување и бара употреба на специјализирано оружје.
Во нападите се користат таканаречени „бункер-бастер“ бомби, меѓу кои и ГБУ-72 „Advanced Penetrator“, тешка околу 2.270 килограми. Овие бомби продираат длабоко во земјата пред да експлодираат, со цел да ги уништат засолнетите цели.
Американскиот министер за одбрана Пит Хегсет изјави дека иранскиот капацитет за производство на балистички ракети е „функционално уништен“, вклучително и фабрики и производни линии. Сепак, постојните резерви очигледно сè уште се користат во нападите.
Поради тоа, САД и Израел се насочуваат и кон мобилните лансери, користејќи разузнавачки податоци и прецизни воздушни удари за нивно лоцирање и уништување.
Овој пристап потсетува на тактиките од Заливската војна во 1991 година, кога американските сили спроведуваа таканаречен „лов на Скад“ ракети во Ирак, обидувајќи се да ги неутрализираат заканите кон Израел.
