Потпретседателката на СДСМ, Јована Тренчевска, побара оставка од министерот за внатрешни работи Панче Тошковски по трагедијата во скопската општина Карпош, во која загинаа мајка и дете.
Таа оцени дека случајот покажал сериозни пропусти на институциите во заштитата од семејно насилство и системски неуспех да се заштитат човечки животи. Според неа, семејно, физичко и психичко насилство било пријавувано две години, а против сопругот имало и други пријави.
„Институциите биле алармирани, имало индиции за ризик, но со несоодветна реакција не ги заштитиле жртвите. Потфрли МВР, потфрлија центрите за социјална работа и целиот институционален систем“, наведува Тренчевска.
Од СДСМ бараат темелна истрага која, како што велат, ќе утврди одговорност со име и презиме кај сите службени лица во МВР, центрите за социјална работа и другите институции кои постапувале во случајот.
Тренчевска посочува дека ова не е изолиран случај и потсетува дека и претходно имало трагедии по пријавено семејно насилство, нагласувајќи дека е потребен „ресет на целиот систем“ и утврдување одговорност.
