СДСМ обвини дека ВМРО-ДПМНЕ се обидува да го дестабилизира одвнатре преку поранешниот функционер Петре Шилегов, по, како што велат, откривањето на бизнис-мрежи поврзани со лидерот Христијан Мицкоски во енергетскиот сектор.
Од СДСМ тврдат дека ваквите напади се резултат на падот на поддршката на ВМРО-ДПМНЕ, што, според нив, се потврдува и во нивните внатрешни анкети. Посочуваат дека претходно биле насочени кон други поединци, а сега, како што велат, се користат различни методи, вклучително и притисоци и уцени.
„Станува јасно дека најавената платформа е всушност платформа за рушење на СДСМ одвнатре“, велат од партијата, додавајќи дека ваквите обиди нема да успеат.
Во соопштението се нагласува дека СДСМ нема повеќе да се занимава со Шилегов, туку ќе се фокусира на, како што наведуваат, мерки за заштита на животниот стандард на граѓаните и продолжување на евроинтегративниот процес на државата.
Партијата најавува и продолжување на, како што велат, разоткривањето на криминално-коруптивни активности поврзани со ВМРО-ДПМНЕ и Мицкоски, со порака дека „сите ќе одговараат“ кога ќе се обезбедат услови за, како што велат, независно обвинителство и судство.
Воедно, од СДСМ упатија критики кон Шилегов, оценувајќи дека може отворено да премине во ВМРО-ДПМНЕ наместо, како што тврдат, да дејствува прикриено против партијата. Според нив, граѓаните веќе препознаваат вакви сценарија и нема повторно да бидат доведени во заблуда.
