СДСМ обвини дека ВМРО-ДПМНЕ се обидува да ја избегне одговорноста во случајот со назначувањето на Душан Адамовиќ за почесен конзул во Србија, истакнувајќи дека одлуката за именување ја носи Владата на седница.
Од партијата посочуваат дека прашањето на одговорноста завршува токму таму – кај извршната власт, која формално и правно ја носи одлуката за избор на почесен конзул. Според СДСМ, покрај институционалната одлука, клучни се и критериумите врз основа на кои е направен изборот.
„ВМРО-ДПМНЕ тврди дека Адамовиќ ги исполнувал критериумите, но не кажува кои се тие критериуми“, наведуваат од СДСМ, отворајќи прашања дали станува збор за политичка блискост со премиерот Христијан Мицкоски или за неговата поврзаност со Српската напредна странка.
Од партијата посочуваат и на информации во јавноста за наводни афери поврзани со Адамовиќ, прашувајќи дали македонските безбедносни служби направиле соодветна проверка пред именувањето и дали постоело лично лобирање.
СДСМ бара премиерот јавно да одговори како од толку угледни бизнисмени во Србија Владата го избрала токму Адамовиќ за почесен конзул на Македонија и дали биле земени предвид сите релевантни околности при донесувањето на одлуката.
