СДСМ обвини дека ВМРО-ДПМНЕ се обидува да го дефокусира вниманието на јавноста откако, како што велат, биле „фатени на дело“ во наводни бизнис-релации со контроверзниот бизнисмен Миодраг Давидовиќ – Дака, кој се наоѓа на црната листа на САД.
Од партијата тврдат дека нивниот антикорупциски тим открил поврзаност меѓу власта и компании поврзани со Давидовиќ, по што, според нив, следувале „спинови и префрлање на темата кон опозицијата“.
„Наместо одговор – дефокус. ВМРО вели фирмата на Дака ги исполнила сите услови, а потоа најавува дека ќе ја исклучи. Тоа значи дека прво дале дозвола, па кога биле фатени – се повлекуваат“, наведуваат од СДСМ.
Според нив, компанијата „Хронос сум“, поврзана со Давидовиќ, била вклучена во Годишниот план за изградба на енергетски објекти за 2026 година.
„Значи Дака работи со ВМРО, а тие се обидуваат темата да ја префрлат како СДСМ да е на власт. Овој дефокус нема да помине“, велат од партијата.
СДСМ обвинува дека зад случајот стои „модел на перење пари, офшор мрежи и сомнителен капитал“, додавајќи дека власта, која претходно го критикувала Давидовиќ, сега му овозможува влез во енергетскиот сектор.
Во соопштението се посочува и дека, додека граѓаните се соочуваат со високи цени на електричната енергија, државната енергетска компанија бележи загуби, а паралелно се договараат, како што велат, „бизниси со сомнителни партнери“.
СДСМ побара Јавното обвинителство да отвори предмет и да ги испита наводите, вклучително и потеклото на капиталот.
„Нема бегање. Одговорност мора да има“, порачуваат од партијата.
