Американскиот претседател Доналд Трамп на состанок на владата се осврна на војната против Иран, која Вашингтон ја нарекува операција „Епски бес“, нагласувајќи дека САД остваруваат убедлива предност на теренот.
Трамп изјави дека американските сили веќе со недели нанесуваат сериозни удари врз иранските воени капацитети, „на ниво какво што ретко се гледа“. Тој повторно тврдеше дека Техеран сака да постигне договор, велејќи: „Тие молат за спогодба, а не јас“, додавајќи дека Иранците се „лоши војници, но одлични преговарачи“.
Според него, Иран имал план да воспостави контрола врз Блискиот Исток, а како клучна причина за воените напади ја посочи заканата од развој на нуклеарно оружје. Овие ставови, како што истакнува, се дел од пошироката позиција на Вашингтон дека американско-израелските операции се успешни и дека САД имаат силна преговарачка позиција.
Во обраќањето, Трамп упати критики и кон сојузниците, особено кон Обединетото Кралство и НАТО. Осврнувајќи се на иранскиот ракетен напад врз воената база Диего Гарсија, тој изјави дека бил употребен проектил со долг дострел, иако претходно се сметало дека Техеран нема такви способности.
Трамп изрази незадоволство од улогата на дел од сојузниците, посочувајќи дека некои земји најавиле вклучување дури по завршувањето на конфликтот. „Треба да се вклучите на почетокот, или дури и пред да започне војната“, порача тој.
Посебно го критикуваше Обединетото Кралство, наведувајќи дека Лондон понудил испраќање носач на авиони, но истовремено ги омаловажи британските воени бродови, оценувајќи ги како „играчки“ во споредба со американските.
