ТРАМП

Донбас станува „Дониленд“?; Зеленски: „Само да не биде Путинленд“

Претседателот на Украина Володимир Зеленски изјави дека е клучно Донецката и Луганската област да останат во состав на Украина, коментирајќи медиумски наводи за предлог дел од Донбас да се преименува во „Дониленд“ во чест на американскиот лидер Доналд Трамп.Коментарот следуваше откако „Њујорк тајмс“ објави дека украински претставници за време на неодамнешните мировни преговори изнеле идеја за преименување на дел од регионот со цел да го придобијат Трамп и да го поттикнат на поостар став кон руските територијални претензии, пишува „Киев индипендент“.„Најважно е Донецката и Луганската област да останат дел од Украина, само да не биде Путинленд. Тоа е најважно“, изјави Зеленски пред новинарите, алудирајќи на рускиот претседател Владимир Путин.Според „Њујорк тајмс“, идејата за преименување била изнесена делумно на шега, но и како дипломатски гест. Предложеното име „Дониленд“, кованица од Донецк, Доналд и Дизниленд, би се однесувало на околу 5.000 квадратни километри во северозападниот дел од Донецката област.Зеленски нагласи дека во преговорите користи исклучиво термини како Донецка област, Луганска област, Донбас и територија на Украина, без други називи.Иако деталите од планот не се јасни, наводно било предложено комитет за мир поврзан со Трамп да учествува во управувањето со тој дел, но идејата не е дел од официјални документи.Преговорите со посредство на САД во последните месеци се фокусирани на иднината на Донбас – регион во источна Украина што ги опфаќа делумно окупираните Донецка и Луганска област. Клучното прашање е територијалната контрола, додека Москва врши притисок Украина да се повлече од преостанатите територии.Трамп, кој за време на кампањата ветуваше дека ќе ја заврши војната во рок од 24 часа, повеќе од една година се обидува да постигне договор преку преговори, што предизвикува фрустрации во Киев.По средбата на Трамп и Путин на Алјаска во август 2025 година, американската администрација сигнализираше подготвеност за можен договор што би вклучувал повлекување на Украина од Донецката област.Русија во меѓувреме го промовира т.н. „Договор од Енкориџ“, според кој Донбас би бил предаден на нив.Украина сè уште контролира околу една четвртина од Донецката област и одбива повлекување, предлагајќи прекин на огнот долж постојните линии на фронтот.

Свет | пред 6 часа

„Имам добри вести“ – Трамп најави помилување на демонстрантки во Иран

Претседателот на САД Доналд Трамп на социјалната мрежа Truth Social соопшти добри вести, кои се однесуваат на помилување на девојки чие погубување наводно го подготвувал Иран.„Добри вести! Штотуку бев известен дека осум жени демонстрантки, кои требало да бидат погубени вечерва во Иран, нема да бидат убиени. Четири ќе бидат веднаш пуштени на слобода, а четири ќе бидат осудени на еден месец затвор“, напиша Трамп и додаде:„Многу ценам што Иран и неговите лидери го почитуваа моето барање, како претседател на САД, и го запреа планираното погубување. Ви благодарам за вниманието посветено на ова прашање“.Инаку, Трамп претходно упати барање до Иран да ги ослободи осумте девојки за кои наводно се подготвувало погубување.„До иранските лидери, кои наскоро ќе преговараат со моите претставници – многу би го ценел ослободувањето на овие жени. Сигурен сум дека ќе го почитувате фактот дека сте го направиле тоа. Ве молам, немојте да им наштетите! Тоа би бил одличен почеток на нашите преговори! Ви благодарам за вниманието посветено на ова прашање“, напиша Трамп на Truth Social.

Свет | пред 6 часа

Трамп: Иран може да добие уште три до пет дена

Претседателот на САД, Доналд Трамп, е подготвен да одобри дополнителни три до пет дена за продолжување на примирјето со Иран, јавува Ројтерс, повикувајќи се на извор запознаен со ситуацијата.Според изворите, Трамп не прецизирал точен временски рок, но нагласил дека прекинот на огнот нема да биде на неопределено време. Ова доаѓа во период на засилени дипломатски напори и обиди да се постигне заеднички предлог меѓу Вашингтон и Техеран.Во исто време, се наведува дека нова рунда преговори меѓу САД и Иран би можела да се одржи веќе во петок, со посредство на пакистански дипломати. Според информациите, постојат „позитивни сигнали“ во контактите со Иран, што отвора можност за брзо продолжување на мировните разговори во наредните денови.Трамп претходно порача дека е отворен за дијалог, но дека американската војска ќе остане во состојба на готовност сè додека Иран не понуди „единствен и конкретен предлог“.

Свет | пред 7 часа

Трамп поставува рок за Иран: Примирјето нема да трае бесконечно

Американскиот претседател Доналд Трамп изјави дека примирјето со Иран ќе биде продолжено „сè додека не биде поднесен нивниот предлог и додека не завршат преговорите, на овој или оној начин“.Два извора запознаени со внатрешните дискусии изјавиле за CNN дека Трамп планира да му даде на Иран ограничен временски рок за изработка на единствен предлог.Според нив, американската администрација не сака неограничено да го продолжува примирјето и е внимателна во однос на можноста Иран дополнително да ги одолговлекува преговорите.Изворите додаваат дека и самиот претседател бил воздржан во однос на продолжување на примирјето по денешниот рок.Соединетите Американски Држави сметаат дека ситуацијата во Иран е слична како по 12-дневната војна. Сепак, сегашниот период има суштинска разлика, а тоа е иранската контрола врз Ормускиот теснец.„Добри вести“ за втората рунда разговори меѓу САД и Иран би можеле да пристигнат веќе во петок, изјавиле претседателот Трамп и пакистански извори за весникот „The Post“ во средата.Извори од Исламабад ги пофалиле позитивните напори во посредувањето со Техеран, отворајќи можност за нови мировни разговори во следните „36 до 72 часа“. На прашање од „The Post“ за овој можен напредок, Трамп во СМС порака одговорил: „Можно е! Претседателот ДЈТ.“Доколку Америка сака да ја одржи сенката на војната, треба да знае дека Ормускиот теснец ќе остане целосно затворен, пренесува Tasnim.

Свет | пред 9 часа

Трамп најави дека САД разгледуваат валутна размена со ОАЕ и можен „финансиски потпор“ поради регионалната криза

Претседателот на САД, Доналд Трамп, изјави дека Вашингтон разгледува можност за валутна размена со Обединетите Арапски Емирати (ОАЕ), како и потенцијална форма на финансиска поддршка за земјата во услови на засилена нестабилност на Блискиот Исток.На прашање дали постои план за воспоставување валутна размена со ОАЕ, Трамп кусо одговори дека „се разгледува“, притоа оценувајќи ги Емиратите како „добар сојузник“. Во ист контекст, тој посочи дека САД би биле подготвени да помогнат доколку партнерот се соочи со потешкотии, додавајќи дека американската политика и ангажманот во регионот веќе имаат значајни финансиски и безбедносни импликации.Според наводите во извештајот, идејата за линија на валутна размена била отворена на средби во Вашингтон минатата недела, каде што гувернерот на централната банка на ОАЕ разговарал со американскиот министер за финансии Скот Бесент и со претставници на Федералните резерви. Таквата алатка обично служи како „безбедносна мрежа“ за обезбедување ликвидност, особено во периоди на шокови на финансиските пазари или зголемени геополитички ризици.Во меѓувреме, амбасадорот на ОАЕ во САД, Јусеф Ал Отаиба, реагираше со порака дека економијата на Емиратите останува отпорна и дека секоја претпоставка оти земјата бара надворешна финансиска поддршка претставува погрешно толкување. Тој нагласи дека партнерството меѓу ОАЕ и САД е долгорочно и се темели на взаемни придобивки, а не на зависност од едностран „спасувачки“ пакет.Изјавата на Трамп доаѓа во момент кога регионалните тензии и ризиците за енергетските текови и финансиската стабилност повторно се во фокусот на глобалните пазари, што го поттикнува интересот за механизми што би ја зајакнале ликвидноста и довербата во критични периоди.

Свет | пред 15 часа

Хаос во Техеран го кочи договорот – Трамп постави ултиматум

Американскиот претседател Доналд Трамп им дал краток рок од три до пет дена на иранските власти да се усогласат и да излезат со конкретен одговор за мировен договор, во спротивно, продолженото примирје ќе биде прекинато, пренесуваат американски медиуми повикувајќи се на извори од администрацијата.Според истите извори, во Вашингтон владее уверување дека внатрешните поделби во Техеран се главната пречка за договор. Воените структури, предводени од Револуционерната гарда, се во судир со цивилните преговарачи, додека врховниот лидер речиси воопшто не комуницира со јавноста.Тензиите дополнително ескалирале по првата рунда разговори во Исламабад, кога военото раководство отфрлило дел од договореното од дипломатите, особено околу отворањето на Ормутскиот теснец.Во меѓувреме, американскиот потпретседател Џеј Ди Венс чекал со часови на писта за лет кон Пакистан, но патувањето било откажано поради отсуство на согласност од иранска страна за нова рунда разговори.Иако во Белата куќа се разгледувале и опции за нови напади врз иранската инфраструктура, Трамп на крајот одлучил да ѝ даде уште шанса на дипломатијата. Според негови соработници, тој смета дека воено веќе го постигнал максимумот и сака да го заврши конфликтот.„Претседателот донесе цврста одлука да ја заврши војната, но нема да се откаже од притисокот“, велат извори блиски до администрацијата.Како клучен адут останува поморската блокада, за која Трамп тврди дека го довела Иран во сериозна финансиска криза. Според него, Техеран губи стотици милиони долари дневно и е под силен притисок да постигне договор.Сепак, во Вашингтон предупредуваат дека доколку во наредните денови не се постигне напредок, воената опција повторно ќе се врати на маса.

Свет | пред 17 часа

„Телеграф“: Администрацијата на Трамп и натаму без јасен план за Иран

Администрацијата на Доналд Трамп се соочува со сериозни критики дека нема јасна стратегија за Иран, додека примирјето меѓу двете страни истекува, објавува британски „Телеграф“, повикувајќи се на извори блиски до американската власт.Според нив, последните денови биле обележани со целосна конфузија во врвот на власта, при што самиот Трамп во рок од 48 часа давал спротивставени изјави – од тврдења дека договорот е „близу“, до оценка дека е недостижен, за на крај да го продолжи примирјето.„Се чини дека никој во администрацијата не знае што се случува. Кој е планот и која е целта. Сè изгледа како хаос“, изјавил извор за весникот.Дополнителна неизвесност внеле и спротивставените информации околу улогата на потпретседателот Џеј Ди Венс, кој според дел од изјавите требало да патува во Пакистан на преговори, додека според други – воопшто немало да замине.Поранешни функционери оценуваат дека Трамп сè повеќе се потпира на личен инстинкт и на тесен круг лојални советници, наместо на институционалните механизми за донесување одлуки во време на воена криза.„Тој не сака формални состаноци и структуриран процес. Смета дека може сам да носи одлуки“, изјавил поранешниот советник за национална безбедност Џон Болтон.Во текстот се наведува и загриженост дека на претседателот му се презентира „разубавена слика“ за текот на војната, додека негативните информации, вклучително и за цивилни жртви, не стигнуваат до него во целост.Контрадикторните пораки од Вашингтон и Техеран дополнително го усложнуваат дипломатскиот процес, а според дипломатски извори од регионот на Персискиот Залив, токму јавните објави на Трамп придонесуваат за нестабилност и ја поткопуваат довербата во преговорите.Иако американскиот претседател претходно тврдеше дека воените цели се речиси постигнати и дека крајот на конфликтот е близу, повеќе од 50 дена од почетокот на нападите, клучните несогласувања остануваат нерешени.

Свет | пред 17 часа

(Видео) Трамп чита Библија по судирот со папата, нови реакции во САД

Американскиот претседател Доналд Трамп читаше дел од Стариот завет во рамки на настанот „Америка чита Библија“, одржан како симболична прослава на духовните темели на САД, само неколку дена по јавниот судир со папата Лав XIV.Во видео-порака снимена од Овалната соба, Трамп го прочита стихот од Втората книга Летописи (7:14): „И ако се понижи мојот народ... ќе му простам гревот и ќе ја излечам неговата земја“, додека зад него беше истакнато претседателското знаме.Настанот е дел од еднонеделен маратон на читање на Библијата, организиран од конзервативната фондација „Фемили полиси алајанс“, во соработка со иницијативата „Кристијанс енгејџд“. Организаторите го претставуваат како обид за враќање на нацијата кон духовните вредности и семејните принципи.Појавувањето на Трамп доаѓа во чувствителен момент, откако претходно предизвика бурни реакции со изјава за можност од „бришење на иранската цивилизација“, како и по објавата на фотографија генерирана со вештачка интелигенција на која е прикажан како Исус.Папата Лав XIV остро ги осуди неговите изјави, нарекувајќи ги „неприфатливи“, по што Трамп возврати со критики на социјалните мрежи, оценувајќи го папата како „слаб“ и „лош за надворешната политика“.Овој судир дополнително ја усложнува позицијата на Републиканската партија пред изборите за Конгресот во 2026 година, особено имајќи предвид дека, според анкети, повеќе од 80 проценти од американските католици имаат позитивен став за папата.Настапот со читање на Библијата, според дел од аналитичарите, е обид на Трамп да ја консолидира поддршката кај религиозните гласачи, но истовремено ги отвора и прашањата за границата меѓу политиката и религијата во актуелниот американски контекст.

Свет | пред 18 часа

Трамп му даде на Иран „неколку дена“ за одлука: продолжување на прекинот на огнот или нова ескалација

Администрацијата на претседателот на САД Доналд Трамп му дала на Иран рок од „неколку дена“ да се усогласи околу преговарачка позиција и да се врати на мировните разговори, со предупредување дека во спротивно продолжениот прекин на огнот може да биде прекинат. Според објавените информации, Вашингтон е подготвен да го продолжи примирјето уште три до пет дена за Техеран да формира јасна контрапонуда за завршување на судирот и за прашањето околу иранската нуклеарна програма.Американски официјални лица тврдат дека во иранското раководство постои длабок раскол меѓу цивилните преговарачи и воениот врв, особено командниот кадар на Корпусот на исламската револуционерна гарда. Како дополнителен товар врз процесот се посочува и тоа што врховниот лидер на Иран наводно речиси и не комуницира со преговарачите, што ја усложнува координацијата во Техеран и ја намалува предвидливоста на одлуките.Поделбите, според тврдењата, станале видливи по првата рунда разговори во Исламабад, кога командантите на Револуционерната гарда отфрлиле дел од предлозите за кои разговарале иранските дипломати. Дополнителни тензии, според истите наводи, се појавиле и по најавата на иранскиот министер за надворешни работи Абас Арагчи за повторно отворање на Ормускиот морски теснец, што наводно било одбиено од воениот врв.Поради неизвесноста во Техеран, била одложена и нова рунда преговори во Пакистан, на која требало да учествува американскиот потпретседател Џеј Ди Венс. Во меѓувреме, според информации од американска страна, дел од советниците во Белата куќа разгледувале и опција за силни напади врз иранската енергетска инфраструктура, но претседателот Трамп одлучил да им даде дополнително време на дипломатските напори.Американските предупредувања се дека воената опција може повторно да се врати на маса доколку посредниците од Пакистан не успеат да обезбедат Иран да се врати на преговарачката маса во зададениот рок. Следните денови, според најавениот временски прозорец од три до пет дена, ќе бидат клучни за тоа дали ќе се задржи кревкиот прекин на огнот или регионот ќе влезе во нова фаза на ескалација.

Свет | пред 18 часа

(Видео) Вирална приказна без потврда: Генерал одбил нуклеарни кодови на Трамп?

Тврдењата дека американскиот претседател Доналд Трамп се обидел да ги активира нуклеарните кодови, а генерал одбил да ја спроведе наредбата, се шират на интернет, но засега нема никакви докази што ги потврдуваат.Белата куќа ги отфрли овие наводи како лажни, реагирајќи по нивното ширење во јавноста. Приказната потекнува од поранешниот службеник на ЦИА, Лери Џонсон, кој во подкаст тврдел дека на состанок во Белата куќа дошло до остар судир меѓу Трамп и началникот на Здружениот штаб, генерал Ден Кејн.Според Џонсон, генералот наводно одбил да овозможи користење на нуклеарните кодови, но како „доказ“ била прикажана само снимка на која Кејн се движи низ дворот на Белата куќа.Ниту една релевантна медиумска куќа или официјален претставник не потврдила дека Трамп побарал активирање на нуклеарниот арсенал. Дури и дел од републиканските политичари изразија сомнеж во ваквото сценарио.„Би морал да видам потврда од најмалку неколку извори пред воопшто да го разгледам ова“, изјави сенаторот Том Тилис.Експертите потсетуваат дека вакво одбивање од страна на генерал би значело сериозна уставна криза, бидејќи системот на нуклеарна команда во САД е структуриран така што законската наредба од врховниот командант мора да се изврши, со дополнителна верификација од министерот за одбрана.Контроверзиите дополнително се засилуваат и поради кредибилитетот на изворот. Џонсон во минатото изнесувал повеќе спорни и непотврдени тврдења, поради што неговите наводи се подложни на сериозен скептицизам.

Свет | пред 18 часа

Трамп направи пресврт: „Очекувам бомбардирање“, па го продолжи примирјето

Само неколку часа пред да објави продолжување на примирјето со Иран, американскиот претседател Доналд Трамп изјави дека „очекува бомбардирање“ и дека американската војска е подготвена за акција.Во интервју за CNBC, Трамп посочил дека не е наклонет кон продолжување на примирјето кое требало да истече, што дополнително ја засили неизвесноста околу развојот на ситуацијата.Сепак, набргу потоа следуваше пресврт, со одлука за продолжување на примирјето, што се толкува како обид да се остави простор за дипломатско решение.Овие изјави доаѓаат во момент кога втората рунда американско-ирански преговори во Пакистан е во застој. Од Белата куќа потврдија дека потпретседателот Џеј Ди Венс нема да отпатува во Исламабад, што дополнително укажува на неизвесноста во преговарачкиот процес.„Сите понатамошни информации за евентуални средби ќе бидат објавени од Белата куќа“, соопштија од администрацијата.Ситуацијата останува напната, со паралелни сигнали за воена подготвеност и дипломатски обиди за деескалација.

Свет | пред 18 часа

Трамп: Очекував поскапување на нафтата поради Иран, но тоа не се случи - можен е договор, но примирјето истекува

Американскиот претседател Доналд Трамп изјави дека очекувал значително поскапување на нафтата поради конфликтот со Иран, но тоа не се случило, додавајќи дека е задоволен од ваквиот развој.Во интервју за CNBC, Трамп оцени дека САД на крајот би можеле да постигнат „одличен договор“ со Иран и со тоа да се стави крај на војната, но посочи дека не очекува продолжување на актуелното примирје кое истекува.Тој призна дека бил изненаден и од движењата на финансиските пазари, бидејќи очекувал остар пад на берзанските индекси.„Мислев дека ќе паднат за 20 отсто. Исто така мислев дека нафтата ќе биде значително поскапа и среќен сум што не е така“, изјави Трамп.Во однос на економските политики, Трамп најави поостар пристап кон компаниите во контекст на царините, по одлуката на Врховниот суд дека неговата администрација немала законска основа за нивно воведување.„Ќе ги запомнам компаниите што нема да бараат поврат на царините“, рече Трамп, испраќајќи сигнал за политика базирана на лојалност кон администрацијата.Повеќе од 3.000 компании веќе покренале постапки за враќање на средствата, во вредност од над 166 милијарди долари.Трамп се осврна и на соработката во областа на вештачката интелигенција и одбраната, споменувајќи договор меѓу компанијата „Антропик“ и Пентагон, кој следува по претходни несогласувања меѓу двете страни.

Свет | пред 1 ден

Трамп тврди дека Иран повеќепати го прекршил примирјето

Американскиот претседател Доналд Трамп изјави дека Иран „повеќепати го прекршил примирјето“, обвинувајќи го Техеран за недоследно почитување на договорените услови. Изјавата ја објави на својата социјална мрежа, без да наведе конкретни детали за наводните прекршувања.Според најавите, привременото примирје истекува доцна во среда според американско време, додека во меѓувреме двете страни меѓусебно се обвинуваат за негово нарушување. Иран претходно тврдеше дека САД го прекршуваат договорот преку воведување ограничувања и мерки поврзани со стратешкиот Ормутски теснец.Како одговор на тие потези, Техеран повторно го затвори овој клучен поморски премин, што дополнително ги зголеми тензичните односи и ризиците за глобалните енергетски текови.Паралелно со дипломатските пораки, продолжуваат и воените и политичките тензии меѓу двете земји, додека во меѓународната јавност се очекува развојот околу можниот нов круг преговори што би можел да се одржи во Пакистан.

Свет | пред 1 ден

Трамп предупредува за сложен процес на извлекување на иранските резерви ураниум

Американскиот претседател Доналд Трамп изјави дека извлекувањето на иранските резерви на ураниум ќе претставува „долг и тежок процес“, по американските напади врз објекти поврзани со нуклеарната програма на Иран.Трамп на својата социјална мрежа „Truth Social“ наведе дека операцијата „Полноќен чекан“, спроведена во јуни минатата година, довела до, како што тврди, целосно уништување на иранските нуклеарни капацитети, поради што процесот на извлекување на нуклеарниот материјал ќе биде сложен и долготраен.Тој во своите објави често го користи изразот „нуклеарен прав“ кога се осврнува на иранските резерви на збогатен ураниум.Во меѓувреме, портпаролката на Белата куќа, Каролин Ливит, изјави дека САД никогаш не биле поблиску до постигнување договор со Иран, и покрај неизвесноста околу евентуалното продолжување на преговорите.

Свет | пред 1 ден

Си Џинпинг: Нормалниот сообраќај низ Ормутскиот теснец мора да продолжи

Кинескиот претседател Си Џинпинг порача дека низ Ормутскиот теснец треба да се одвива „нормален сообраќај“, нагласувајќи ја важноста на оваа клучна поморска рута за глобалната економија.Изјавата ја дал за време на телефонски разговор со саудискиот престолонаследник Мохамед бин Салман.Во меѓувреме, се очекува средба меѓу американскиот претседател Доналд Трамп и Си Џинпинг во Кина во текот на мај, откако претходно планираното патување било одложено поради војната меѓу САД, Израел и Иран.

Свет | пред 1 ден

Трамп го обвини министерот за енергетика: „Целосно греши за цените на горивото’“

Претседателот на САД, Доналд Трамп, изјави во понеделникот дека министерот за енергетика Крис Рајт „целосно греши“ кога сугерира дека цените на гасот можеби нема да паднат под 3 долари до следната година.„Не, мислам дека греши во врска со тоа. Целосно греши“, изјави Трамп, додавајќи дека цените ќе паднат „штом ова заврши“, мислејќи на војната во Иран, во изјави за The Hill.Рајт во неделата изјави дека тоа „можеби нема да се случи до следната година“, наведувајќи ги нарушувањата во Ормускиот теснец, и додаде дека „цените веројатно го достигнале својот врв“, пренесува Baha.Трамп претходно изјави и дека „нема да има проблем да се сретне“ со иранските лидери, додека американски претставници патуваат во Пакистан на разговори. Во меѓувреме, иранските државни медиуми соопштија дека Техеран нема да учествува под актуелните услови, наведувајќи „т.н. поморска блокада“ и предупредувајќи на „заканувачка реторика“.

Свет | пред 1 ден

Трамп: Првата светска војна траеше 4 години, 3 месеци и 14 дена, Втората светска војна 6 години, нема да ме брзаат

Американскиот претседател Доналд Трамп вели дека не е под притисок да склучи договор со Иран и ги обвини демократите дека ја поткопуваат американската позиција. Во објава на неговата социјална мрежа Truth Social, Трамп ги отфрли медиумските написи за притисок и тврди дека проблемот со Иран ќе го реши „правилно“, поправајќи го „хаосот“ што, како што вели, го оставиле неговите претходници.„Демократите прават сè што можат за да ја оштетат многу силната позиција во која се наоѓаме во однос на Иран. Иако Првата светска војна траеше 4 години, 3 месеци и 14 дена, Втората светска војна 6 години и 1 ден, Корејската војна 3 години, 1 месец и 2 дена, Виетнамската војна 19 години, 5 месеци и 29 дена, а Ирак 8 години, 8 месеци и 28 дена, тие сакаат да кажат дека сум ветил пораз на Иран за 6 недели, а всушност, од воен аспект, тоа беше многу побрзо од тоа, но нема да дозволам да ги брзаат Соединетите Американски Држави во склучување договор кој не е толку добар колку што може да биде.Читам во лажните вести дека сум под „притисок“ да постигнам договор. ТОА НЕ Е ВИСТИНА! Не сум под никаков притисок, иако сè ќе се случи релативно брзо. Времето не е мој непријател, единственото важно е конечно, по 47 години, да го решиме ХАОСОТ што другите претседатели го дозволија бидејќи немаа храброст или визија да го направат она што требало во врска со Иран.Ова се спроведува совршено, во размер како Венецуела, само како поголема и посложена операција. Резултатот ќе биде ист. Во мојот прв мандат ја изградив најсилната армија што нашата земја некогаш ја имала, вклучувајќи го и формирањето на Вселенските сили. Во мојот втор мандат правилно и разумно ја користам нашата армија за да ги решам проблемите што ни ги оставија други, со многу помалку разбирање или способност“, напиша Трамп.

Свет | пред 2 дена

Трамп: Пакистанскиот генерал не ми препорача ништо во врска со блокадата на Иран

Американскиот претседател Доналд Трамп денеска ги демантираше извештаите дека началникот на пакистанската армија, генерал Асим Мунир, му посочил оти поморската блокада на Иран претставува пречка во преговорите со Техеран.Трамп за американскиот медиум The Hill изјави дека Мунир „не препорачал ништо за блокадата“, со што ги негираше претходните наводи.Демантот следи по тврдењата на пакистански извори пренесени од агенцијата Anadolu Agency, според кои генерал Мунир во телефонски разговор му рекол на Трамп дека блокадата е „пречка во преговорите“ со Иран, на што американскиот претседател наводно одговорил дека ќе го „разгледа советот“.Телефонскиот разговор се одржал пред можниот втор круг преговори меѓу САД и Иран во Пакистан, при што Исламабад продолжува да игра улога на посредник меѓу двете страни.

Свет | пред 2 дена

Трамп: Израел нема улога во мојот став за војна со Иран

Американскиот претседател Доналд Трамп денеска ги отфрли тврдењата дека Израел го поттикнал на војна со Иран, наведувајќи дека неговиот став произлегува од нападите на Хамас од 7 октомври 2023 година.Во објава на својата социјална мрежа Truth Social, Трамп истакна дека Израел „никогаш не го наговорил на војна“, туку дека одлуките се резултат на случувањата од октомври и неговото долгогодишно уверување дека Иран не смее да поседува нуклеарно оружје.Тој воедно упати остри критики кон медиумите, кои ги нарече „лажни вести“, обвинувајќи ги дека шират невистини и манипулираат со анкети. Трамп повторно ги спомена и претседателските избори во 2020 година, тврдејќи дека биле наместени.Американскиот претседател повлече и паралела со Венецуела, наведувајќи дека „резултатите во Иран ќе бидат неверојатни“, слично како, според него, во оваа латиноамериканска држава.Во пораката до идните ирански власти, Трамп нагласи дека земјата може да има „голема и просперитетна иднина“, доколку новите лидери донесат „паметни одлуки“, при што во заграда додаде и „промена на режимот“.

Свет | пред 2 дена

(Видео) Водител на Фокс за расправијата меѓу Папата и Трамп: Од денес, повеќе не сум католик

Водителот Шон Ханити од Fox News изјави дека повеќе не се смета себеси за католик, по јавниот спор меѓу папата Лав XIV и американскиот претседател Доналд Трамп околу американските напади врз Иран.Во својата емисија, Ханити остро го критикуваше папата, обвинувајќи го дека не реагира доволно јасно на, како што наведе, злоупотребите во Иран, вклучувајќи репресија и поддршка на милитантни групи. Тој истакна дека пораснал во католичко семејство, посетувал католички училишта и студирал теологија, но дека неговиот став се менува по последните случувања.Ханити ја оспори и позицијата на Ватикан, нагласувајќи дека спречувањето на Иран да развие нуклеарен капацитет е, како што рече, „морално оправдано и логично“.Напнатоста меѓу Ватикан и Вашингтон се зголеми откако папата Лав XIV ги осуди американските и израелските напади врз Иран и повика на итен прекин на конфликтот и дипломатско решение. Доналд Трамп, пак, повтори дека Иран не смее да поседува нуклеарно оружје, нагласувајќи дека тоа претставува безбедносен ризик.Ханити во својата изјава застана на страната на Трамп и додаде дека ставот на папата е политички обоен и дека не ги зема предвид глобалните безбедносни закани.

Свет | пред 2 дена

Иранскиот претседател: Кој е Трамп да ни ги одзема правата?

Иранскиот претседател Масуд Пезешкијан остро реагираше на изјавите на американскиот претседател Доналд Трамп, оценувајќи дека САД немаат право да му ги оспоруваат нуклеарните права на Иран.„Трамп вели дека Иран не може да ги користи своите нуклеарни права, но не кажува поради кој злостор. Кој е тој да ѝ ги одзема правата на една нација?“, изјави Пезешкијан, пренесува иранската агенција ИСНА.Изјавата доаѓа во услови на засилени тензии меѓу Техеран и Вашингтон, особено околу прашањето за нуклеарната програма на Иран, која останува една од клучните точки на несогласување меѓу двете страни.

Свет | пред 3 дена

Камала Харис со жестоки обвинувања за Трамп: Влезе во војна во која го вовлече Биби Нетанјаху, војна што нашиот народ не ја сака

Поранешната потпретседателка на САД, Камала Харис, го обвини претседателот Доналд Трамп дека бил „вовлечен“ во војна со Иран поради одлуките на израелскиот премиер Бенјамин Нетанјаху.„Влезе во војна во која го вовлече Биби Нетанјаху, да бидеме јасни – војна што американскиот народ не ја сака и со која ги доведе во опасност американските војници“, изјави Харис за време на говор во Детроит.Таа дополнително обвини дека воената операција „Епски бес“ била искористена како „слаб обид за одвлекување внимание“ од аферата со документите поврзани со Џефри Епштајн.Харис ја оцени администрацијата на Трамп како „најкорумпирана, најбезчувствителна и најнекомпетентна во историјата на САД“, додавајќи дека претседателот се обидува да се прикаже како силен преку употреба на воена моќ.„Овој претседател е првиот од Втората светска војна наваму кој ја напушти одговорноста да ги негува и штити сојузништвата и пријателствата на САД“, истакна таа.Според Харис, ваквата политика довела до тоа САД да станат „непостојан и непоуздан партнер“ на меѓународната сцена, со намалено влијание во клучните глобални прашања.Во својот говор, таа се осврна и на домашни теми, најавувајќи дека Демократската партија ќе победи на претстојните избори за Конгресот во ноември.

Свет | пред 3 дена

САД отвораат пат за нови терапии, Трамп нареди забрзано истражување на психоделични лекови

Американскиот претседател Доналд Трамп потпиша извршна уредба со која се забрзува процесот на одобрување и истражување на психоделични супстанци, меѓу кои и ибогаин, како потенцијален третман за посттрауматско стресно нарушување (ПТСН).„Оваа уредба ќе обезбеди луѓето кои страдаат од тешки симптоми конечно да добијат шанса да си ги вратат животите и да живеат посреќно“, изјави Трамп во Белата куќа, додавајќи дека одлуката значително ќе го забрза пристапот до нови терапии.На настанот присуствуваа и подкастерот Џо Роган и американскиот воен ветеран Маркус Латрел, кој ја поздрави иницијативата.„Ќе спасите многу животи. Мене ова целосно ми го промени животот“, му порача Латрел на Трамп.Ибогаинот, супстанца добиена од растение во Западна Африка, во поголеми дози може да предизвика халуцинации и е поврзан со одредени здравствени ризици, вклучително и срцеви компликации. Сепак, дел од ветераните сведочат за позитивни ефекти по третмани во странство.Уредбата предвидува забрзување на научните истражувања, но не значи автоматска легализација или широка клиничка примена на овие супстанци.Интересот за вакви терапии расте, особено кај ветерани кои се соочуваат со тешки форми на депресија и анксиозност. Според податоците на американското Министерство за ветерани, во 2023 година дури 6.398 ветерани извршиле самоубиство.Трамп посочи дека првичните резултати кај некои пациенти покажале значително намалување на симптомите, нагласувајќи дека доколку се потврдат ефектите, тоа би можело да има големо влијание врз третманот на менталните нарушувања.

Свет | пред 3 дена

Папата Лав XIV: Не ми е во интерес конфликт со Трамп

Папата Лав XIV се обиде да ги намали тензиите со американскиот претседател Доналд Трамп, по нивната неодамнешна јавна размена на критики. Тој изјави дека дел од медиумските извештаи за неговите изјави за време на африканската турнеја не биле целосно точни и дека не му е во интерес да влегува во политички конфликт со Трамп.Зборувајќи со новинарите на лет кон Ангола, папата нагласи дека неговиот говор во Камерун, каде што зборувал за „шака тирани кои го разоруваат светот“, бил подготвен многу порано и не бил директно насочен кон американскиот претседател. Според него, дел од толкувањата во јавноста погрешно ја претставиле неговата порака.Напнатоста се зголеми откако Трамп го нарече папата „слаб во однос на криминалот“ и го критикуваше неговиот став за надворешната политика, по што следеа и остри реакции од двете страни.И покрај тоа, папата Лав XIV најави дека ќе продолжи јавно да зборува за војните и глобалните конфликти, но без намера да влегува во директен судир со политички лидери.

Свет | пред 4 дена

Демократите бараат проверка на способноста на Трамп за вршење на функцијата

Во САД се појавија нови политички повици за активирање на 25-тиот амандман од Уставот, со цел евентуално отстранување на претседателот Доналд Трамп од функцијата, откако тој упати остри закани кон Иран и изјави дека „целата цивилизација би можела да исчезне“ доколку Техеран не се повлече.Според извештаи, дел од демократите во Конгресот сметаат дека ваквите изјави, заедно со контроверзните постапки околу досиејата поврзани со Епстин и јавните напади кон папата Лав XIV, укажуваат на неспособност за нормално извршување на функцијата. Поради тоа, тие се повикуваат на 25-тиот амандман, кој овозможува смена на претседател ако не е способен да ги извршува своите должности.Актуелната дебата е дополнително засилена од изјави на поранешни политички сојузници на Трамп и дел од јавноста, како и од анкети кои покажуваат намалена доверба во неговата ментална стабилност и способност за управување со државата.Сепак, експерти и поранешни високи функционери оценуваат дека шансите за активирање на 25-тиот амандман се мали, бидејќи за тоа е потребна широка политичка поддршка во Конгресот, која во моментов не постои.

Свет | пред 4 дена