NASA денес соопшти дека го одложува лансирањето на мисијата за испраќање четворица астронаути на патување околу Месечината, откако за време на проверката на ракетата се појавиле проблеми.
Менаџерите на мисијата изведуваа детална проба на лансирањето, позната како „wet dress rehearsal“ (симулација на лансирање со полнење на гориво), во Сончевиот центар Кенеди на Флорида, кога инженерите откриле протекување на водород во основата на ракетата Space Launch System, пренесува NBC News.
NASA била принудена да ја прекине пробата малку по полноќ по источновоамериканско време, со преостанати околу пет минути и 15 секунди до симулираното одбројување за лансирање.
Нешто по 2:00 часот наутро по источновоамериканско време, NASA објави дека ќе се откаже од лансирањето на мисијата Artemis II околу Месечината, за тимовите да можат да ги прегледаат податоците и да изведат нова проба.
Сега планираат лансирање најрано во март.
Агенцијата наведе дека има достапни прозори за лансирање од 6 до 9 март, како и на 11 март, а по потреба и дополнителни датуми во април.
Претходната, беспилотна мисија Artemis I околу Месечината во 2022 година била одложена шест месеци поради протекување на водород откриено за време на првата проба.
Со оглед на тоа што за прв пат луѓе ќе летаат на ракетата Space Launch System и во капсулата Orion, залогот за мисијата Artemis II е голем.
