Сејед Хасан Хомеини ги повика граѓаните да не ги напуштаат улиците и џамиите, туку во црна облека да се собираат на плоштадите до крајот на војната со САД и Израел.
Ниту за момент не напуштајте ги улиците и џамиите. Нашата мека моќ се срцата на луѓето и нивното присуство на терен – тоа нè одржа досега“, порача Хомеини. Тој додаде дека „од денес до крајот на војната, секому е поединечна обврска да биде во џамиите“ и ги повика верниците да го исполнат тоа.
Нашите ровови се џамиите и градските плоштади“, рече тој, нагласувајќи дека „секој плоштад мора да биде во рацете на народот, облечен во црно и со знамето на имам Хусеин во рацете“.
Повикот за носење црна облека и истакнување на знамиња на имам Хусеин е силно симболичен во шиитската традиција. Хусеин, внук на пророкот Мухамед, бил убиен во 680 година во битката кај Кербела и се смета за симбол на мачеништво, жртва и отпор против неправда.
Во иранскиот политички дискурс неговата фигура често се користи како метафора за борба против надворешна закана или внатрешна неправда.
Сејед Хасан Хомеини формално не е дел од највисокото државно раководство, но неговото презиме носи голема политичка тежина. Тој е внук на Рухола Хомеини, водач на Исламската револуција од 1979 година и основач на сегашниот ирански систем.
Се смета за влијателна верска фигура и припадник на умерената струја во Иран.
Пораките за излегување на плоштадите и посета на џамиите се дел од долгорочната пракса на иранскиот режим, кој во кризни ситуации поттикнува масовни јавни собири како знак на политичка и општествена кохезија.
