Австралија, како прва држава во светот што воведе забрана за користење социјални мрежи за лица помлади од 16 години, веќе четири месеци ја спроведува оваа мерка, но резултатите се поделени.
Законот беше усвоен на 29 ноември 2024 година во парламентот во Канбера, а почна да се применува од 10 декември 2025 година. Со него се забранува отворање и користење профили на најголемите платформи како Facebook, Instagram, TikTok, Snapchat, X, YouTube и други.
Премиерот Ентони Албанезе тврди дека мерката веќе дава резултати, посочувајќи дека младите повеќе време минуваат надвор, читаат и се дружат со семејството.
Владата соопшти дека од стапувањето на законот во сила се деактивирани или ограничени повеќе од 4,7 милиони профили на деца и тинејџери.
Сепак, практичната примена се покажала значително покомплицирана. Компаниите се задолжени да спречат пристап за малолетници преку проверки на возраст, вклучително и со технологија за препознавање лице или идентификациски документи, а за непочитување се предвидени казни до 49,5 милиони австралиски долари.
И покрај тоа, многу родители и наставници тврдат дека младите лесно ги заобиколуваат ограничувањата. Дел од нив користат лажни податоци, други се служат со постари лица за верификација, а некои користат технички алатки за прикривање на идентитетот.
Истражувањата покажуваат и дека наставниците не се доволно подготвени да се справат со последиците од забраната, особено бидејќи дел од платформите, како што е YouTube, сè уште се користат во образованието.
Во меѓувреме, дел од младите сметаат дека мерката ја ограничува нивната слобода на изразување, оценувајќи дека социјалните мрежи се еден од главните канали преку кои комуницираат и ги изразуваат своите ставови.
И покрај контроверзиите, интересот за слични мерки расте и во други држави. Шпанија, Данска, Обединетото Кралство и Франција веќе разгледуваат воведување минимална возраст за користење социјални мрежи, додека на ниво на Европска Унија сè уште нема единствена регулатива.
Стручњаците предупредуваат дека клучниот предизвик останува техничката изводливост на проверката на возраст и заштитата на личните податоци, додека ефектите од ваквите мерки ќе бидат видливи дури на подолг рок.
