Претседателот на ФИФА, Џани Инфантино, најави можност фудбалските федерации ширум светот да добијат поголем дел од средствата од резервите на организацијата, кои се проценуваат на околу 5 милијарди евра.
Во писмо упатено до шесте континентални конфедерации, Инфантино навел дека ќе поддржи „највисоко ниво на дополнително финансирање што може одговорно да се исплати“.
Најавата доаѓа во период на зголемен притисок по повлекувањето на проектот FIFA Forward Enterprise (FFE), кој предвидуваше продажба на удели во Светското првенство и други натпреварувања на приватни инвеститори.
УЕФА и КОНКАКАФ побарале ФИФА од своите резерви да исплати по 10 милиони долари, односно околу 8,8 милиони евра, на секоја од 211-те членки.
За предлогот Советот на ФИФА ќе расправа на состанокот закажан за 15 октомври.
„Нема однапред да зборувам за износот. Една бројка може да го поттикне разговорот, но не може да претставува целосна глобална политика“, навел Инфантино.
Првиот човек на ФИФА повторно го бранеше повлечениот комерцијален предлог, наведувајќи дека неговата цел била да се обезбедат дополнителни средства за развој на фудбалот.
Претседателката на Фудбалската асоцијација на Англија и потпретседателка на ФИФА, Деби Хјуит, претходно побара објавување на сите документи поврзани со FFE, како и независна истрага за проектот.
Инфантино во март 2027 година ќе се кандидира за четврти мандат на чело на ФИФА. Потенцијалните противкандидати имаат рок до 18 ноември да најдат алтернативен кандидат.
