Премиерот Христијан Мицкоски оцени дека податоците за инфлацијата во јули и август се охрабрувачки, посочувајќи дека во двата месеца таа била пониска во споредба со просекот во Европската Унија.
„Имаме два месеци коишто не охрабруваат – тоа се јули и август. Во јули беше 2,3%, во август 2,6%, во услови кога во Европа во јули беше 2,9%, а во август 3,2%“, рече Мицкоски.
Тој потсети дека пред четири години, во услови на енергетска криза, повисоката инфлација во Македонија во однос на Европската Унија се објаснувала со увезена инфлација.
Според него, последните податоци покажуваат дека инфлацијата може да биде и под европското ниво.
„Еве, ние покажавме дека тоа не е точно и дека тоа биле лажни кампањи, дека можело да се биде на ниво под тоа коешто го има европското, и тоа за 50% пониска инфлација“, изјави премиерот.
Во однос на септември, Мицкоски посочи дека треба да се почекаат официјалните податоци од Државниот завод за статистика.
„Сè уште месецот трае; да почекаме статистиката да објави, па ќе можеме да коментираме“, рече тој.
Мицкоски додаде дека преку Државниот пазарен инспекторат се следат и се прават проценки за движењето на цените, особено кај прехранбените производи и безалкохолните пијалаци.
Според првичните проценки што ги сподели, на годишно ниво инфлацијата кај овие производи се очекува да се движи меѓу 1,5 и 2 проценти, но конечните податоци ќе ги објави Државниот завод за статистика.
