Појавата на информации на социјалните мрежи за наводна присутност на ешерихија коли во скопската вода предизвика вознемиреност кај граѓаните, но надлежните институции категорично демантираат дека водата во Скопје е загадена и небезбедна за пиење.
Во текот на денот, Министерството за здравство, Институтот за јавно здравје, Центарот за јавно здравје – Скопје, Агенцијата за храна и ветеринарство и Градот Скопје излегоа со информации дека нема потврда за присуство на бактеријата во градскиот водоснабдителен систем.
Од АХВ информираа дека до овој момент немаат добиено известување од ЈП „Водовод и канализација – Скопје“ за незадоволителен резултат од лабораториско испитување на водата, врз основа на кој би била изречена забрана за нејзино користење.
„Граѓаните не треба да стравуваат. Водата од градскиот водовод во Скопје е безбедна за пиење и употреба“, соопштија од АХВ.
Од Министерството за здравство, пак, посочија дека нема ниту еден регистриран или хоспитализиран пациент чија здравствена состојба е поврзана со консумирање загадена вода во Скопје. Истото го потврдиле и директорот на Инфективната клиника, д-р Фадил Цана, Институтот за јавно здравје и Центарот за јавно здравје – Скопје.
Градоначалникот на Скопје, Орце Ѓорѓиевски, на вонредна прес-конференција исто така изјави дека не е точно дека е пронајдена бактерија во скопската вода. Тој најави дека ќе се преземат мерки против оние што шират дезинформации и паника.
На прес-конференцијата присуствуваше и директорот на ЈП „Водовод и канализација“, Иван Митровски, кој потврди дека водата во Скопје е безбедна за користење.
Во меѓувреме, Јавното обвинителство соопшти дека оформило предмет „по допрен глас“ за проверка на информациите за наводно енормно загадување на природата со отпад во заштитеното подрачје во близина на изворите Рашче.
Надлежен јавен обвинител ќе ги координира активностите на Државниот инспекторат за животна средина и надлежните инспекциски служби за да се утврди потеклото на депонијата и евентуалните последици.
