Иран: Американскиот „економски војна“ против Техеран би го прекршила меѓународното право

Иран денеска остро реагираше на најавите од САД за дополнително засилување на економскиот притисок врз Техеран, оценувајќи дека таквиот пристап би претставувал прекршување на меѓународното право.

Портпаролот на иранското Министерство за надворешни работи, Есмаил Багаеи, напиша на платформата X дека банки, компании и аеродроми кои се под исклучива јурисдикција на една држава не смеат да бидат присилувани од друга држава да се откажат од законска трговија со трета земја.

— реклама —

Неговата реакција доаѓа откако американскиот претседател Доналд Трамп се закани со строги казни за земјите кои и натаму ќе го поддржуваат Иран, во рамки на напорите на Вашингтон да го зголеми економскиот притисок врз Техеран.

„Економската присила, осмислена за да се натера една суверена држава да ги промени своите законски политички одлуки, претставува директен меѓународно противправен акт“, порача Багаеи.

— реклама —

Тој оцени дека таканаречените секундарни санкции претставуваат кршење на Повелбата на Обединетите нации.

— реклама —

Според него, ваквата политика на САД не е само продолжение на, како што ја нарече, „незаконската економска војна“ против Иран, туку и обид Вашингтон да воспостави екстериторијална контрола врз одлуките на други суверени држави.

Багаеи предупреди дека, во комбинација со американската поморска блокада на иранските пристаништа, планот на Трамп би можел суверенитетот на други земји да го претвори во нешто „привремено, условно и укинливо по волја на друга сила“.

Тој дополнително оцени дека ваквите мерки носат ризик од, како што рече, „враќање на класичниот колонијализам во полн обем“.

Иран останува на ставот дека секоја држава има право самостојно да одлучува со кого ќе тргува, додека Вашингтон продолжува со политика на максимален економски притисок врз Техеран.