Иран најавува ново оружје и подземни ракетни градови: „Нема да можете да нè запрете“

Иран располага со подземни капацитети за производство на ракети и беспилотни летала, а во случај на нова ескалација најавува и претставување на оружје за кое тврди дека ќе го изненади светот.

— реклама —

Портпаролот на Корпусот на исламската револуционерна гарда (ИРГЦ), бригадниот генерал Хосеин Мохеби, изјави дека противниците нема да можат да го спречат Иран во производството и модернизацијата на оружјето, ниту за момент.

Тој најави дека, доколку дојде до трет бран судири, иранските воздухопловни сили ќе претстават нови воени достигнувања и оружје што, според него, ќе предизвика изненадување во светот. Ова го соопшти на прес-конференција во пресрет на Неделата на иранското воздухопловство, пренесе агенцијата ИРНА.

— реклама —

Како едно од значајните достигнувања на воздухопловните сили на ИРГЦ, Мохеби го посочи создавањето подземни „ракетни градови“. Според него, тие овозможиле производството на ракети и беспилотни летала да продолжи и за време на воени судири и непријателски бомбардирања.

— реклама —

Тој објасни дека производството првично било префрлено од површината во подземни објекти, а благодарение на домашното знаење, географската разновидност и големината на иранската територија, биле создадени и подземни центри за производство на ракети.

Мохеби тврди дека противникот ги брои иранските ракети, очекувајќи дека нивните залихи наскоро ќе се исцрпат, но не ја зема предвид можноста за продолжување на производството во подземните капацитети.

— реклама —

Тој додаде дека Иранската револуционерна гарда развила технологии со кои, според неговите тврдења, ја намалила ефикасноста на современите системи за противвоздушна одбрана на противникот, меѓу кои ги наведе системите ТХААД и „Патриот“.